"Қўқон-1912" нега ҳеч кимни трансфер қилмади?

Жанговар дуранг қайд этилган баҳсдан кейин "Қўқон-1912" устози Бахтиёр Ашурматовдан ўзимизни қизиқтирган бир нечта саволларга жавоб олдик.

— 15 очко, 9-ўрин. Бу сизни қониқтирмаслигини биламиз. Танаффус маҳали жамоада нимани ўзгартирдингиз?

— Биринчи давра ҳақида 2 хил фикр билдиришимиз мумкин. Салбий: уй учрашувлари биз учун омадсиз кечди. Айнан Қўқонда йўқотилган очколар турнир жадвалидаги ўрнимизга ёмон таъсир қилди. Ижобий: йигитлар ҳеч қайси ўйинда таслим бўлишмади ва охиригача курашишди. Футболда характер кўп нарсани ҳал қилади, бизда шундай жамоа шаклланяпти. 

Бундан ташқари, совринли ўринларга даъвогарлар ҳали узоқлашиб кетгани йўқ. Йўқотилган очколар ўрнини 2-даврада тўлдириб оламиз.

Танаффусда ўйинчиларнинг жисмоний ҳолатини кўтариш учун ҳаракат қилдик. Хатолар устида ишлаб, тактик камчиликларни ўргандик. Чунки ортда қолган 12 турда позицион ҳужумлар ташкиллаштиришда анча оқсашимиз кўриниб қолди. 

Трансфер ойнасида янги футболчиларни таклиф қилмадик. Мавжуд кадрлар натижани яхшилашга уриниб кўрамиз.

— Олдинроқ ярим ҳимоячилар бўш ўйин кўрсатаётгани ҳақида гапиргандингиз. Нега янги ўйинчилар таклиф қилинмади? Бу мураббийнинг шахсий қарорими? Ёки...

— Яхши савиядаги футболчиларни харид қилиш ёки ижарага олиш қимматга тушади. Эркин агентлар ҳам шартнома учун катта маблағ талаб қилади. Шу туфайли ушбу ғоядан воз кечдик. Бу бир томондан таркибдаги шогирдларимизга ишонишимизни билирса, бошқа томондан янги номларни жалб қилиш осонмаслигинини кўрсатади.

— Юқорида айтганингиздек, "Қўқон-1912" уй учрашувларида атиги 2 очко йиғди. Лекин, сафар ўйинларидаги рейтингда "Пахтакор"дан кейин 2-ўринни эгаллаб турибди. Буни қарангки, танаффусдан кейинги 1-рақиб "Навбаҳор". Мазкур баҳс Яйпанда ўтаркан. Наманган клубига қарши баҳс ҳақида гапирсангиз...

— "Навбаҳор"га қарши учрашувлар ҳар доим мураккаб бўлган. Сафар ўйинларида қарши ҳужум тактикасида ҳаракатлансак, уйда 1-рақамда ўйнашимиз керак. Наманганликлар ҳам биз билан ўйинда 2-рақамга ўтиб ўйнаса керак...

Аниқ айта оламан, бизни майдонимиздаги ўйинларда рақибларнинг барчаси очиқ футболдан қочяпти. Ўтган мавсум аксинча бўлган, Қўқонда яхшироқ ўйин кўрсатгандик.

— Олдинроқ ВАР тизимини танқид қилгандингиз. Балки, ўша фикрлар қизишиб турганингизда пайдо бўлгандир?

— Йўқ, кескин фикр билдиришимга сабаб бор эди. Деярли бир хил вазиятлардда рефери турфа хил қарор чиқарди. ВАР ҳатто эпизодни кўриб ҳам чиқмаганди.

Умуман олганда, бу борада 2 хил фикр янграяпти. Ўйлайманки, мазкур тизимнинг барча ўйинларда ишлашини таъминлаш керак. Тўғри, бу молиявий томондан қимматга тушиши мумкин. Лекин, босқичма-босқич ўтиш керак. 7 ўйиндан 2тасида ВАР ишласа, қолганлар ВАР йўқлигидан азият чекиши мумкин. 

Бутун дунё шу тизимни қўллаяпти, фақат биз мукаммаллаштиришимиз керак. Мен кўпроқ ҳакамлар ўз устида ишлашини сўрардим. Кўряпмиз, баъзан кино кўргандек 9 минутгача пауза юзага келтиришяпти. Бу яхши эмас.

— ВАР пайдо бўлгач, ўйиндаги тўхталишлар янада кўпайди. Айниқса, бизда. Бу майдондаги футболчига қанчалик таъсир қилади?

— Таъсир қилади. Ўзи футболимиз Европага қараганда анча секин. Биз тезликни ошириш, ҳужумкор ва гўзал футбол устида ишлашимиз керак. ВАР футболни янада секинлаштирди. Мухлислар кўрадиган чиройли ўйин камайди.

Шунингдек, ўйинчи гол ургандан кейин хурсанд бўлиш, бўлмасликни билмай қоляпти. Бу жозибани йўқотади. Аниқ айта оламан, футбол мен ўйнаган даврга нисбатан анча секинлашди.

Такрорлайман, ҳакамлар ўз устида кўпроқ ишлаши керак. Баъзи рефериларга ВАР ҳам ёрдам беролмаётганини кўрдик. Шунингдек, мураббийлар ҳам кўпроқ изланиб, футболни тезлаштиришга уриниши лозим. 

— Охирги саволим бугунги ҳакамлар ҳақида. Сидоровнинг голидан кейин Агишевга кескин эътироз билдирган Бақоев ўйиндан четлатилди. Ўша вазият ҳақида...
— Кўрдим. Ундан олдин менда ҳам ҳакамга нисбатан эътироз бўлганди. Бақоев эса ўша вазиятда қизишиб кетди, уни тушуниш керак. Рефериларга нисбатан ўйин давомида эътирозлар бўлиши таббий ҳолат. УФА ҳам, мухлислар ҳам буни тўғри тушунишини сўрардим. Майдон ташқарисида улар билан муносабатларимиз яхши.

— Демак, ўйиндан ташқари ҳолат йўқ эдими?

— Мен жуда ҳам узоқда эдим. Бу борада аниқ фикр билдиролмайман. Лекин, Норхоновга нисбатан қоида бузилганга ўхшади.