"Қўқон-1912": "Динамо" билан ўйинга тайёргарлик қизғин

"Қўқон-1912" шу куни Самарқандда "Динамо" билан куч синашади. Айни дамда клуб аъзолари бўлажак баҳсга Қўқонда тайёргарлик кўрмоқда. Янги мавсум бошланиши арафасида яхши ният ила, кеча Қўқондаги "Марказий" стадионда қўй сўйиб, бугун ҳатми-қуръон тиловат қилинди. Бу урф-одат ўзбек футболига бегона эмас. Кўплаб жамоа футболчилари шу каби тадбирларда мавсумни жароҳатларсиз ўтказишни ният қилади, яна кимдир ўз ниятларини ижобат бўлишини яратгандан сўрайди.

Аввал хабар берганимиздек, мавсумлар оралиғида таркибга янги келиб қўшилган футболчиларни тақдимот маросими бугун ўтказилиши лозим эди. Аммо маълум сабабларга кўра, мазкур тадбир эртанги кунга қолдирилди. Бу ҳақда кейинроқ сайтимизда батафсил тўхталамиз.

"Динамо"га қарши баҳс олдидан мураббийларни ташвишга солаётган жиҳати бу - Баҳодир Акрамов ва Игорь Голбаннинг жарохатга йўлиққани бўлиб турибди. Шунингдек ҳимоячи Шохруҳ Холматовда ҳам жарохат мавжуд. Мазкур футболчилар катта эхтимол билан Самарқанддаги баҳсни ўтказиб юборади.

Қолган ўйинчиларда ҳеч қандай муаммо йўқ ва уларнинг бариси юқори кайфиятда бўлажак баҳсга қизғин тайёргарлик кўрмоқда.

Эслатиб ўтамиз, "Динамо" - "Қўқон-1912" баҳси 14 март, шанба куни соат 16:00да бошланади.