"Қишки бозор": Англиядаги энг машҳур трансферлар. Бонидан - Куадрадогача

Вильфрид БОНИ

Қаердан: "Суонси"
Қаерга: "Манчестер Сити"
Нархи: 32,3 миллион евро



26 ёшли ивуарлик футболчи "Суонси"дан "Сити"га ўтди.  Бони "шаҳарликлар" билан 2019 йилга қадар шартнома тузди. Футболчи ҳозирга қадар янги клубида ўйнамади, сабаби терма жамоаси сафида Африка кубогида иштирок этмоқда.

Габриэл ПАУЛИСТА
Қаердан: "Вильярреал"
Қаерга: "Арсенал"
Нархи: 15 миллион евро



24 ёшли марказий ҳимоячининг "Вильярреал"нинг яхши ўйинларида хиссаси бор. "Арсенал" устози Арсен Венгер Габриэлга ишонишини маълум қилди. "Арсенал" томонидан сотиб олинган олдинги бразилиялик – Андре Сантос эди. У Туманли Альбиондаги икки йилдан сўнг клубни тарк этганди. Габриэл ўзини қандай намоён эта оларкин?

Виктор ВАЛЬДЕС
Қаердан: эркин агент
Қаерга: "Манчестер Юнайтед"



Вальдеснинг "Барселона" билан амалдаги шартномаси июлда тугаганди, аммо жароҳати бор бўлган посбонни ҳеч ким ўз сафига чорлагани йўқ. Кузда Виктор "Ливерпул"га ўтиши мумкин эди. Аммо якунда испаниялик посбон "иблислар" сафига ўтди.

"Манчестер Юнайтед" Вальдес билан 18 ойлик шартнома тузди.

Жермейн ДЕФО

Қаердан: "Торонто"
Қаерга: "Сандерленд"
Нархи: Жози Алтидор



2013 йил ёзида "Сандерленд" премьер-лига тарихидаги энг ёмон трансферлардан бирини амалга оширди – "қизил мушуклар" 13 миллион доллар эвазига америкалик Алтидорни сотиб олишди. У бир ярим йил ичида битта гол урди. Январь ойи бошида "Сандерленд" "Торонто"га Алтидорни 32 ёшли Жермейн Дефога алмашиш таклифи билан чиқди. Клуб эса бунга дарҳол ижобий жавоб қайтарди. Дефо иккита ўйинда битта гол уриб бўлди.

Марк ШВАРЦЕР

Қаердан: "Челси"
Қаерга: "Лестер"
Нархи: бепул



Бу дарвозабоннинг даври ўтиб бўлди. 2013 йил ёзида Шварцер "Челси"га ўтган. Ўша пайтда 40 ёшда бўлган посбон бошқа клубга ўтмаслиги тахмин қилинганди. Аммо январда австралиялик дарвозабонга "Лестер"дан таклиф тушди. "Кўклар" жамоадаги учинчи дарвозабон учун бир тийин ҳам сўрашмади. Шварцер "тулкилар" сафида дебют қилди. У Европа кучли чемпионатида майдонга тушган энг қари ўйинчига айланди - 42 ёш ва 118 кун.

Шола АМЕОБИ

Қаердан: эркин агент
Қаерга: "Кристал Пэлас"



"Ньюкасл" афсонаси ўтган йил Туркиянинг "Газиантеп Бююкшехир Беледиеспор" клубига ўтиб кетганди. Бироқ, тезда Амеоби уйини соғиниб қолди ва агентига янги вариантларни сўраганди. "Ньюкасл"га қайтишнинг имкони бўлмади. "Вест Бромвич" ва "Кристал Пэлас" ўртасидаги "жанг"да Лондон клуби ғолиб чиқди. Энди Англияда қуйидаги ҳазил оммабоп: "Реал"да Роналду, Бензема ва Бэйл, "Барселона"да Месси, Суарес ва Неймар, "Кристал Пэлас"да эса Яя Саного, Шамах ва Амеоби бор"...

Хуан КУАДРАДО

Қаердан: "Фиорентина"
Қаерга: "Челси"
Нархи: 33,4 миллион евро



"Вольфсбург"га ўтган Андре Шюррленинг ўрнига "Челси" колумбиялик Хуан Куадрадони сотиб олди. "Фиорентина"нинг собиқ футболчиси "Челси"да 74-рақам остида ўйнайди. Футболчи 2014 йилги Жаҳон чемпионатида тўртта голли пас билан бу борада энг яхши натижа қайд этганди.
sport-express.ru сайтидан олинди


Нарзулла Сайдуллаев тайёрлади