Қирол Карл III нинг тахтга ўтириши муносабати билан АПЛда яна бир қатор ўйинлар қолдирилиши мумкин

Маросим келаси йилнинг 6 май санасига белгилангани эълон қилинди. 

Ўтган ой Қироличанинг дафн маросими бўлиб ўтганида Премьер-лиганинг иккита ўйини сурилди, шулар қаторида "Челси"нинг “Ливерпул”га қарши ўйини ҳам қолдирилди. "Манчестер Юнайтед"нинг "Лидс Юнайтед" билан уй ўйини ҳам бўлиб ўтмади.

Тадбир ўша дам олиш кунларидаги футбол ўйинларига таъсир қилиши мумкин, бироқ сана ва бошланиш вақти ҳали тасдиқланмаган. Барча тегишли спорт органларига ҳали кўрсатмалар берилмади. Қиролича вафотидан сўнг якуний қарор чиқариш Англия Футбол Лигаси ва Англия Премьер-лигасининг ўзига қўйиб берилгани боис бу сафар ҳам аниқ кўрсатмалар берилишига кафолат йўқ. 

"Вест Хэм", "Тоттенхэм" ва "Фулхэм" Лондонда жойлашган ўша куни ўз уйида ўйнайдиган жамоалар бўлиб, уларнинг рақиблари "Манчестер Юнайтед", "Кристал Пэлас" ва "Лестер Сити" бўлиши режалаштирилган. Ушбу баҳслар катта эҳтимол билан қолдирилади. Полициянинг бутун мамлакат бўйлаб чақирилиши мумкинлигини инобатга олсак, "Ливерпул"нинг "Брентфорд" билан тўқнашуви ва "Лидс"нинг "Манчестер Сити" сафари ҳам сўроқ остида қолиши мумкин.

Агар Премьер-лига ҳукумат тавсияларига амал қилса, юқоридаги ўйинлар кечиктирилиши ёки 24 соат орқага сурилиши мумкин. Трансляция қилиш бўйича танловлар ўйинларнинг бўлиб ўтадиган санадан 3-6 ҳафта олдин белгиланади. Тегишли кўрсатмалар ундан олдин берилиши кутилмоқда.