O'zbekiston milliy terma jamoasi va "Qizilqum" klubi himoyachisi Islom To'xtaxo'jaev endilikda faoliyatini Qatarning "Al Garafa" klubida davom ettiradi. Bu hamyurtimiz uchun legioner sifatidagi ikkinchi klubidir. 2020 yilgi mavsumda Xitoyning "Shenyang Urban" jamoasida to'p tepgan futbolchi orada ma'lum vaqt navoiylik sharafini himoya qildi. Uning Qatardagi dastlabki taassurotlari qanday? "Al Garafa" varianti qayerdan paydo bo'ldi? Klubda qanday sharoitlar yaratilgan?
Islom To'xtaxo'jaev "Al Garafa" bilan shartnoma imzoladi
- "Al Garafa"dan taklif tushganini Sarvar Shoahmedov aytib qoldi. Yakunda klubdagilar bilan maslahatlashgan holda bir qarorga keldik. Faoliyatimda yangi sahifa ochilyapti. O'ylaymanki, "Al Garafa"ga yordamim tegadi. E'tiborimni tortgan jihat, klubda ko'tarinki kayfiyatda kutib olishdi. Sharoitlar a'lo darajada. Faqat futbol haqida o'ylaysiz. Boshqa narsalarga chalg'imaysiz. Biror kamchilikni aytmasingizdan hal qilib qo'ygan bo'lishadi.
Yuqorida takidlaganimizdek faoliyatida ikkinchi bor legionerga aylangan Islom To'xtaxo'jaevning Qatardagi maqsadlari katta. Xitoydagiga qaraganda ko'proq muvaffaqiyat qozonishni niyat qilgan. Lekin futbolchining yangi jamoada o'ynab ketishi bir necha omillarga bog'liqligini ham unutmaslik lozim. Suhbatdoshimizning bu boradagi fikrlari quyidagicha bo'ldi.
- Ha, bu ikkinchisi. Inson doim harakatdan to'xtamasligi kerak. Oldinga intilish zarur. Barchasi o'zimga bog'liq. Mehnatdan qochmasam jamoaga tezroq kirishib ketaman. Bunga albatta ma'lum vaqt ketadi.
O'zbekistonlik futbolchilar uchun odatda poytaxt klublari kuchli chempionatlarga yo'l olishi uchun tramplin vazifasini o'taydi. Endilikda sekin-asta viloyat jamoalarida ham bu jarayon yuz berayotgan yoqimlidir. Xo'sh, bu ishni faqat Toshkent jamoalari bajarishi kerakmi?
- Avvallari O'zbekistondagi barcha eng yaxshi futbolchilar Toshkentda yig'ilardi. Bunday holat ko'p yuz bergan. E'tibor bersangiz, hozirda qolgan jamoalarda ham nomlar etarlicha. Superliga ham ancha qizg'in pallaga kirib boryapti. Sabab sifatida shularni keltirishim mumkin.
Qatarda Sardor Rashidov, Temurxo'ja Abduxoliqov, Sanjar Shoahmedov, Sanjar Tursunov o'zlaridan yomon taassurot qoldirishmagan. Bu borada Islom To'xtaxo'jaev qanday maslahat oldi?
- Ularga maslahatlari uchun rahmat aytaman. Fursatdan foydalanib O'zbekiston futbolchilar uyushmasi rahbari Kamoliddin Murzoevga ham minnatdorchilik bildiraman.
"Al Garafa"ni italiyalik Andrea Strammachoni boshqarmoqda. Murabbiy bilan ilk suhbat qanday bo'lgani va nimalar istayotgani haqida ham so'radik.
- Birinchi navbatda ajoyib inson. Tajribamdan kelib jamoadagi yosh futbolchilarga ko'maklashishimni ta'kidladi. Jamoada o'zim o'rgangan 20 raqamda o'ynayman.
Bilasiz, joriy yil Qatarda har to'rt yillikning nufuzli musobaqasi Jahon chempionati o'tkaziladi. Shaxarda tayyorgarlik kayfiyati qanday? Hamyurtimiz uchrashuvlarni qayerdan tomosha qiladi? Himoyachi bunga javobi shunday bo'ldi.
- Tayyorgarlik qizg'in ketayotgani yaqqol ko'rinib turibdi. Xudo xohlasa Jahon chempionatini stadiondan kuzatish nasib qilsin. Shaxsan o'zim Braziliya terma jamoasiga muxlislik qilaman.
