ПРО-Лига. Жамшид Юсупов: "Қаерда ва қачон бўлса ҳам футбол ўйнашни истаймиз"

Юзага келган танаффусдан фойдаланиб сайтимиз мухбирлари ПРО-Лига жамоалари футболчилари билан интервьюлар ташкил этишмоқда. Қуйида Тошкентнинг "Оқ-тепа" клуби етакчи футболчиларидан бири Жамшид Юсупов билан ташкил этилган интервьюни эътиборингизга ҳавола этамиз.

- Жамшид, айни дамда "Оқ-тепа" жамоаси машғулотлари қай тарзда ўтмоқда?

- Карантин туфайли ПРО-Лига ўйинлари вақтинча тўхтатилди. Юзага келган танаффусдан фойдаланиб, машғулотларни тоғда ташкил этмоқдамиз. Клубимизга тегишли бўлган худудда мураббийлар штаби ва шифокорлар назорати остида машғулотларимиз карантин қоидаларига амал қилинган ҳолда ўтказилмоқда.

- ПРО-Лига клублари орасида қайси жамоанинг чемпионликка имкониятларини юқори баҳолайсиз?

- Чемпионатда иштирок этаётган барча 8 жамоанинг имкониятларини тенг баҳолайман.

- Бугунга қадар ПРО-Лигада 3 та тур учрашувлари ўтказилди. "Зомин" мағлуб этилди, "Турон" билан мағлубият, "Нефтчи"га қарши баҳсда дуранг. Шу ўйинлар ҳақида нималарни айта оласиз?

- Ўзбекистон кубоги мусобақасининг гуруҳ босқичига муваффақиятли ўтиб олганимиздан сўнг, ПРО-Лигада дастлабки турни ўз майдонимизда "Зомин"га қарши ўтказдик ва ғалабага эришдик. Иккинчи турда "Турон"га қарши қизиқарли ўйин бўлди, афсуски биргина гол учрашув тақдирини ҳал қилди, мағлуб бўлдик. 3-турда "Нефтчи"га қарши ўйиннинг биринчи бўлимида мағлуб бўлаётгандик. Иккинчи бўлим олдидан бизга мураббийларимиз тегишли кўрсатмаларни беришди ва якунда дуранга эришдик. Очиғини айтганда, ўша ўйинда "Нефтчи" вакиллари яхшиямки бир нечта голли вазиятлардан фойдалана олишмади. Умуман олганда ортда қолган 3 та турни ёмон ўтказмадик деб ўйлайман. Турдан-турга ўйинларимиз янада кучайиб бораверади.

- Пандемия даврида ПРО-Лигани марказлаштирилган холда ўтказиш фикрига муносабатингиз қандай?

- Инсон соғлиги ҳамма нарсадан устун туради. Агар марказлаштирилган чемпионат футболчиларга вирус юқиш хавфини камайтирса, биз бунга тайёрмиз. Қаерда ва қачон бўлса ҳам футбол ўйнашни истаймиз.

- Ҳужумчи сифатида сизнингча қайси бири кучли? Орипхўжа Абдухолиқов, Темурхўжа Абдухолиқов. Сиз Орипхўжа билан кўп бор бирга ўйнагансиз...

- Ҳа, албатта. Ўйламай айтишим мумкинки, Темурхўжа Абдухолиқовнинг имкониятлари юқори. Орипхўжа ҳали ёш, иқтидорли футболчи. Ўз устида ишласа, келажакда акаси каби миллий терма жамоа сафида майдонга тушиши мумкин.

- Футболчи сифатидаги мақсадларингиз қандай? Бугунга қадар нималарга эришдингиз, нималарга эндиликда эришмоқчисиз?

- Ҳозирча футболда эришган натижаларим унчалик ҳам юқори эмас. Албатта, "Оқ-тепа" жамоасини Суперлигага олиб чиқишга ўз ҳиссамни қўшмоқчиман. Келажакда ўз ўйинларим билан мураббийлар эътиборини қозониб, Суперлигада тўп суришни мақсад қилганман.

Бекзод Толибов ёзиб олди