Польша термаси бош мураббийи: "Левандовски учун афсусдаман"

Польша терма жамоаси бош мураббийи Чеслав Михневич ЖЧ-2022 1-тури доирасидаги Мексикага қарши учрашувда (0:0) пенальтидан унумли фойдалана олмаган ҳужумчи Роберт Левандовскига раҳми келди.

"Ўйиндан сўнг мен Робертга унга ҳамдард эканлигимни айтдим. Унинг хафа бўлгани, сингани аниқ эди. Аксига олиб кийиниш хонамизда мониторлар бор ва ўйиндан сўнг улар орқали бир неча бор пенальтини  намойиш қилишди. Роберт ҳам кўрди.

Унга қандай ёрдам бера оламан? Менимча, у ўзи бундай жараёндан қандай чиқиб кетишни яхши билади. У ҳаммасини ҳазм қилиши керак. Жамоа ҳам уни қўллаб-қувватлашга доим тайёр. Биламан, Роберт бу голни орзу қилганди. У учун афсусдаман, лекин кўплаб буюк футболчилар йирик мусобақаларда пенальтидан гол ура олишмаган", – деди мутахассис.

Польша 2022 йилги Жаҳон чемпионатидаги навбатдаги ўйинни 26 ноябрь куни Саудия Арабистони термасига қарши ўтказади.