"Пахтакор"нинг 9-рақамдаги футболчисига қарши мактаб боласининг хатосини такрорладик" — Андрей Шипилов иштирокидаги матбуот анжумани

"Жуда яхши ўйин гувоҳига айландик. Биз анча яхши даражада қаршилик кўрсатдик. Рақибни ўрганиш жараёнида футболчиларга "Пахтакор"нинг 9-рақамдаги футболчисини қандай ҳаракатланишини кўрсатиб, унга қарши қандай ўйнаш кераклигини алоҳида таъкидлагандим. Ҳеч қандай қийинчилик жойи йўқ эди. Жуда қўпол хатоларга йўл қўйилди. Бу биринчи ёки иккинчи синф дарслиги, лекин аниқ 10-синф дарслиги эмас! Буни майдонда ҳам, видеода ҳам кўрсатгандим. Аммо барибир ўша хатога йўл қўйдик. Нима ҳам дердим, "Пахтакор"нинг 9-рақамли футболчисига (Машарипов) баракалла. Шу футболчи менинг жамоаларимга қарши доим яхши ўйнайди. 

Ўйлайманки, бугунги ўйинимизни кўриб ҳеч ким биз майдонда шунчаки номига ҳаракат қилганимизни айтишга жазм этмайди. Иккинчи бўлимда биз ўйинни назорат қилдик. "Пахтакор" жисмонан чарчаб қолди, биз эса яққол ташаббусга эгалик қилдик. Рақибни ғалаба билан табриклайман ва 6-май куни бўладиган ОЧЛ доирасидаги баҳсда уларга омад тилайман" - дея гапириб ўтди Андрей Шипилов.

- "Металлург" юқори прессинг уюштирган ҳолда "Пахтакор"га ҳимоядан ҳужумга чиқишда муаммолар туғдирди. Ўйин давомида жамоа ёмон кўринмади, аммо рақиб дарвозаси олдида чинакамига хавфли вазиятлар содир этилмади. Яъни, голдан кейин дарвоза томон деярли аниқ зарба берилмади.

- Биз хавфли вазиятлар яратмадикми? Стандарт вазиятлари ҳам яхшигина қурол аслида. Отахоновнинг жарима майдончасига ерлатиб узатган тўпига Пардаев инглизча услубда зарба беролмади. Акс ҳолда яхшигина хавф бўларди. Ҳеч қандай муаммога ўрин қолмасди. Муҳаммад Исаевни ҳам кўпроқ дарвозага зарба бериши учун майдонга туширгандим. Лекин рақиб ҳам позицион жиҳатдан яхши ҳимояланди. Биз асосан қанотлар орқали ҳужумга кескинлик бермоқчи бўлдик.

- Нега охирги ўйинларда самарадорлик кўрсатаётган Музаффар Музаффаров майдонга тушмади?

- Очиғини айтаман, унинг 3та сариқ карточкаси борлиги туфайли тўртинчисини олишидан қўрқдим. Шу боисдан ҳам дисквалификация хавфини олдини олиш учун Музаффарни туширмадим. Ҳақиқатдан ҳам Музаффаров мавсумни жуда яхши ўтказмоқда. Аслида уни иккинчи бўлимда майдонга туширмоқчи эдим. Шунчаки қанотлар орқали кескинликни ошириш мақсадида Суҳроб Нуруллоевни туширишга қарор қилдим. Бизда деярли барча самарадор ўйнамоқда. Станислав Андреев, Зоҳид Абдуллаев, Музаффаровда ҳам иккитадан гол мавжуд. Бугун Пардаевни туширим адашмадим, тўғрими?  Чунки у иккита ўйиндан буён гол урмоқда. Демак тўғри қарорга келганман, қўшиласизми? 

- Сергей Тумасяннинг ўйинидан қониқмаяпсизми ёки бошқа сабаб у бугун бошланғич таркибда тушмадими?

- Бу стратегик режамиз билан боғлиқ масала. Бу позицияда Абдурахимов билан Тумасян ўйнамоқда. Руҳан Абдурахимов ўзининг собиқ жамоасига қарши яхшироқ ва агрессивроқ ўйнашини инобатга олган ҳолда уни майдонга туширдим. Ўйлашимча, Баҳром бугун ишончни оқлади ва муносиб ўйнади. Тумасянга эса бугун омад кулмади. Айни пайтда жамоа таркибида ротация бўлмоқда. Ўтган йили айнан ўзингиз мазкур масала бўйича савол берган эдингиз. Жиззахдаги ўйиндан кейин ҳам журналистлар менга ротация бўйича савол беришганди.

- "Металлург" ўз уйида жуда яхши ўйнамоқда. Доим ғалаба. Лекин сафарда ҳозирча ғалаба қозонишни уддасидан чиқилгани йўқ. Бу нима билан боғлиқ?

- Қўшиламан, биз яхши ўйнамоқдамиз. Лекин меҳмондаги ўйинда натижа йўқ. Термиздаги баҳс билан чемпионатни бошлагандик. "Сурхон" билан ўйинда дурангни ғалабага айлантиришнинг имкони бўлганди. Самарқандда ғалабага муносиб ўйнамадик. Аммо мағлубиятга ҳам лойиқ эмасдик. Жиззахда эса ҳисоб 2:0га айлангач ўйинни ўз қўлимизга олдик ва вазиятдан чиқиб кетишга яқин келгандик. Лекин бизнинг дарвозамизга ақлбоварқилмас голлар уришди. Бугун эса биз ҳам шундай голлардан урдик. Ҳар доим шундай чиройли голлар уришимизни истардим. 

- Сервер Жепаров келаси ўйинга қадар тайёр бўладими?

- Менимча, йўқ. Сервер жуда катта профессионал. Жепаров майдонга чиқишни жуда истамоқда. Лекин бундай футболчи билан катта таваккалга қўл уришни истамасдим. Биз унга қандайдир уколлар ёрдамига майдонга тушиш имкониятини тақдим этишимиз мумкин. Буни ўзи ҳам хоҳламоқда. Майдонга тушишга жуда қаттиқ истак билдирмоқда. Лекин мен бунга йўл қўймайман. Жепаровдек футболчининг жароҳати билан "Локо" ёки "Пахтакор" каби жамоалар ҳам таваккалга қўл уришмасди. Жепаров тўлиқ тайёр ҳолатда бўлган пайтдагина уни майдонга туширамиз. Мен эскича методдан фойдаланмайман. Менга бундай ўргантишмаган. Бизнинг штабда юқори даражадаги тиббиёт ходимлари ишлашади.