"Пахтакор" Португалия юқори лигасида ўйнаган бразилиялик дарвозабон билан шартнома имзолади
15 янв 01:10
Янгиликлар

"Пахтакор" Португалия юқори лигасида ўйнаган бразилиялик дарвозабон билан шартнома имзолади

Пойтахтнинг "Пахтакор" клуби янги дарвозабон билан шартнома тузди.

"Пахтакор" клуби бразилиялик дарвозабон Жонатан Луис билан шартнома имзолади.

У Португалиянинг юқори лигасида 125 та ўйинда майдонга тушган. Сўнгги жамоаси "Риу Аве". Аввалги мавсумда клубининг асосий посбони бўлган. 2023/24 йилги мавсумда жами 29 маротаба асосий таркибда майдонга тушган. Жорий мавсумда асосий таркибдаги сўнгги ўйинини 4 октябрь куни "Фамаликао" (1:1) жамоасига қарши ўтказган. 9 август куни старт олган Португалия чемпионатида "Спортинг"га қарши ўйин билан мавсумни бошлаган.

Бўйи 190 см бўлган дарвозабон 1991 йилда Бразилиянинг Сан-Мигел-ду-Уэсти шаҳрида таваллуд топган. Фаолиятини асосий қисмини Португалиянинг икки лигасида ўтказган.

"Бугунги кунда "Пахтакор"да икки нафар ёш дарвозабон бор. Жонатан Луис каби статистикага эга посбонларни ҳар доим ҳам чемпионатимизда кўравермаймиз. Бежизга дарвозабон ярим жамоа дейилмайди. У жамоамизда соғлом рақобат ярата олади деб ўйлайман. Бу Назаров ва Шевченко учун ҳам катта мактаб бўлиши керак. Чунки "Пахтакор"нинг келажаги айнан шу икки посбонда деб биламан. Олдимизда таркибни кучайтириш бўйича яна бир икки футболчилар турибди. Ўтказган икки ўйинимиздан келиб чиқсам Педро Морейранинг муносабати менга ёқди, у ёшлар билан тажрибали футболчиларни бир таркибда жам қила оляпти", - дейди клуб раисининг ўринбосари Дилшод Каримов.