ЎзПФЛ U-13 ҳамда U-15 биринчиликларини янги форматда ўтказади
11 июн 2020 16:48
Янгиликлар

ЎзПФЛ U-13 ҳамда U-15 биринчиликларини янги форматда ўтказади

Осиё футбол конфедерациясининг талаби билан ўтказиладиган профессионал футбол клублари қошидаги U-13 ва U-15 жамоалари турнири янги босқичга олиб чиқилади.

Бунда жамоалар бир мавсум аввал қайд этган натижасига кўра, саватларга тақсимланади.

Мусобақада Coca Cola Суперлиганинг 14 ҳамда Про-лиганинг 8 жамоаси тарбияланувчилари иштирок этади. Бунда 8 жамоа турнирни саралаш босқичидан бошлайди. Улар орасидан икки клуб ўтган мавсум натижаларига кўра энг яхши деб топилган 14 клуб қаторига қўшилади. Яъни, Ўзбекистон Coca Cola кубоги формати амалда бўлади.

Финал босқичида 16 жамоа 4 гуруҳга тақсимланади. Ҳар бир гуруҳдан энг яхши икки жамоа чорак финал иштирокчисига айланади. Пандемия сабабли 2020 йилги мусобақада барча учрашувлар марказлашган ҳолда ўтади ва фақатгина битта учрашувдан иборат бўлади.

Режага кўра, ҳар икки мусобақанинг саралаш учрашувлари 4—6 сентябрь кунлари бўлиб ўтади. U-13 мусобақасининг финал босқичидаги гуруҳ ўйинлари 14—20 сентябрь кунлари, плей-офф ўйинлари эса 5—11 октябрь кунлари ўтказилади.