Ўзбекистонлик ҳакам Англияда бўлиб ўтадиган ўқув курсларига таклиф этилди

Ёш ҳакамлар учун ташкил этилган ОФКнинг «Келажак» лойиҳаси бўйича сўнгги икки йил давомидаги курсларида муваффақиятли иштирок этган ўзбекистонлик ҳакам Наим Қосимов 2014 йилнинг 23-28 февраль кунлари Англияда бўлиб ўтадиган малака ошириш курсларига таклиф этилди.

Англиядаги ўқув-машғулот курслари «Келажак» лойиҳаси ҳакамлари учун катта тажриба мактаби вазифасини ўтайди. Мазкур курсларда ёш ҳакамлар Англия Премьер-Лигасида фаолият олиб бораётган ҳакамлар билан учрашиш ва уларнинг фаолияти билан яқиндан танишишга муваффақ бўладилар.

Маълумот ўрнида, 25 ёшни қарши олган Наим Қосимов республика тоифасидаги ҳакам сифатида якунига етган мавсумда Ўзбекистон Биринчилиги баҳсларида бир қатор учрашувларни бошқарган.