Ўзбекистон U-21да икки мураббий. Аслида вазият қандай эди?

Бироз олдин сайтимизда "Сирли ўзбек футболи. Ўзбекистон U-21 Хитойга бир мураббий билан кетиб, бошқа мураббий билан қайтмоқда" номли мақола чиққанди.

Ушбу вазиятга ЎФА матбуот хизмати ойдинлик киритди.

"Хитойдаги халқаро мусобақага Ўзбекистон U-21 терма жамоасини икки мураббий олиб кетди. Ҳозирги кунда ушбу жамоада бош мураббий йўқ. Дилшод Нуралиев кетгач ҳозирча бош мураббий лавозими бўш турибди. Шу боис ЎФА бу жамоани икки мураббий бошчилигида Хитойга юборди. Яъни Саидов ва Абдурасулов тандем сифатида ишлашди. Бу нарса Швеция ва Исландия каби терма жамоаларда кўп йиллар давомида қўлланилиб келинганидан хабарингиз бор. Хитойдаги мусобақанинг дастлабки икки учрашувида ўйин қайдномасига Абдурасулов бош мураббий сифатида ёзилди, охирги баҳсда эса Саидов. ЎФА иккала мураббийга ўзини кўрсатиш учун имконият берди. Хитойдан қайтиб келингач ушбу жамоага янги бош мураббий тайинланади", - дейди ЎФА матбуот хизмати бошлиғи Ёқубжон Бобожонов.