Ўзбекистон U-17 бош мураббийи Жамолиддин Раҳматуллаев: "Жаҳон чемпионатида бундан ҳам кучли томонларимизни кўрсата оламиз"

Ярим финалда кореялик тенгқурларига имкониятни бой бериб мусобақа билан хайрлашган вакилларимиз бугун тунда юртимизга қайтиб келишди. Кўриниб турибдики футболчиларнинг ўзига бўлган ишончи ортган, ўзига ҳос тажриба тўплашган. Биз мусобақанинг бошқа фойдали жиҳатлари ҳусусида терма жамоа бош мураббийи Жамолиддин Раҳматуллаевга юзландик. 

"Авваламбор бизни қўллаб-қувватлаб турган барча ишқибозларимизга раҳмат. Албатта бундай катта халақаро мусобақалар фойдага ишлайди. Ҳар бир ўйинда масъулият, босим бор. Кучли рақиблар билан камчиликларимизни кўриб олдик. Яхши тажриба тўпладик. Ўйлайманки, бу Жаҳон чемпионатида асқотади.

Халқимиз биздан яхши натижа кутаётганди. Чунки бу ёш тоифасида ҳали Жаҳон чемпионатига анчадан бери чиқмаётган эдик. Катта меҳнат қилинди. Худо бизни сабабчи қилди. Ўзим учун эмас, шогирдларимнинг кейинги фаолияти учун бу Осиё кубоги пойдевор вазифасини ўтайди. 

Қайсидир маънода фаолиятимда янги саҳифа очди, дея оламан. Бу менинг илк Осиё чемпионатим эди. Терма жамоани Жаҳон чемпионатига олиб чиқиш ҳар бир мураббийнинг орзуси бўлса керак. Худо хоҳласа, Жаҳон чемпионатида бундан ҳам кучли тарафларимизни кўрсата оламиз",- дейди Жамолиддин Раҳматуллаев.