Ўзбекистон (U-16) терма жамоаси Туркияда икки ғалабага эришди

Ушбу йиғин доирасида бир қанча назорат учрашувлари ўтказилмоқда. Ҳозирги кунгача терма жамоамиз иккита учрашув ўтказди ва икки ғалабага эришди. Жумладан 23 август куни "Истамбул Спорт" (U-17) га қарши кечган учрашувда вакилларимиз йирик 7:1 ҳисобида ғалабага эришди. Кеча эса навбатдаги учрашув бўлиб ўтди. "Бешиктош" (U-17) га қарши кечган учрашувда ҳам ўсмирларимиз 3:2 ҳисобида ғалаба қозонди.

Эслатиб ўтамиз, Ўзбекистон U-16 ўсмирлар терма жамоаси 2014 йили Таиланд мамлакати мезбонлик қиладиган U-16 ўсмирлар ўртасидаги Осиё чемпионати финал босқичи саралаш баҳсларида иштирок этади. Маълумот ўрнида, «В» гуруҳи ўйинларига 2013 йилнинг 25-29 сентябрь кунлари Ўзбекистон пойтахти Тошкент мезбонлик қилади. Ўйинлар Тошкентдаги «ЖАР» cтадионида бўлиб ўтади. Хабарингиз бор, U-16 ўсмирлар ўртасидаги ОЧ-2014 саралаш баҳсларига аввалроқ қуръа ташланган ва унга кўра, Темур Олимхўжаев қўл остидаги 1998 ва ундан кейинги йилларда туғилган футболчилардан иборат Ўзбекистон ўсмирлар терма жамоаси (U-16) Фаластин, Яман ҳамда Мальдив ороллари ўсмирлар терма жамоаларига қарши тўп суради.