Ўзбекистон U-16 терма жамоаси Хитой йиғинини якунлади

Ўсмирларимиз Хитойда дастлаб Мўғулистон U-16 терма жамоасига қарши учрашувда 12:0 ҳисобида зафар қучишди. Иккинчи беллашув Хитой U-17 терма жамоаси билан ўтказилиб, унда жамоамиз 0:2 ҳисобида имкониятни бой берди. Хитой ушбу баҳсда бир ёш катта футболчилардан иборат терма жамоаси билан ҳаракат қилди.

Хитойдаги йиғин ва кейинги режалар хусусида Олимхўжаев қуйидагича таъкидлади:

- Хитойдаги йиғин биз учун фойдали бўлди. Аксарият футболчилар ёзги дам олишдан қайтишгани сабабли жисмоний ҳолатларини яхшилаш устида ишладик. Мўғулистонни йирик ҳисобда мағлуб этдик. Хитойликлар шогирдларимдан каттароқ бўлишса-да, ўйин бўйича улардан деярли қолишмадик. Вазиятлардан фойданала олмаслик панд берди. Йиғин мобайнида хатоларимизни аниқлаб, тегишли хулосалар чиқардик. Навбатдаги йиғинларда шу жиҳатларга эътибор қаратамиз.

25 август куни Тошкентда йиғилиб, машғулотларни бошлаймиз. 31 август куни Қатарга йўл олиб, 2 ва 4 сентябрь кунлари Қатар ўсмирлар терма жамоасига қарши 2 назорат баҳсида майдонга тушамиз. Кейин эса Фаластинда ўтадиган саралаш баҳсларида иштирок этамиз. Ҳозирча тайёргарлигимиз режа асосида кетмоқда.

Ўзбекистон U-17 ўсмирлар терма жамоаси 16-20 сентябрь кунлари Фаластинда ўтадиган саралаш беллашувларида Мальдив ороллари, Фаластин ва Яман термаларига қарши ўйнайди.