Ўзбекистон Чемпионати ва Кубоги баҳсларини бошқариб борадиган ҳакамлар тасдиқланди

Ўтган ҳафтада ЎФФ мажлислар залида Ўзбекистонда фаолият олиб борадиган ҳакам ва назоратчилар иштирокида йиғилиш бўлиб ўтди. Мазкур йиғилишда ЎФФ ҳакамлар ва назоратчилар қўмитаси янги мавсум олдидан ФИФА тестларидан ҳамда назарий машғулотларидан муваффақиятли ўтган ҳакам ва назоратчилар номини эълон қилди.

Шунингдек, янги мавсум олдидан ташкил этилган имтиҳонлардан ўта олмаган ҳакам ва назоратчилар захира кунида қайтадан имтиҳонлардан ўтиши таъкидланди.

Йиғилишда қатнашган ЎФФ ҳакамлар ва назоратчилар қўмитаси бошлиғи Ноил Лутфулин футболга тадбиқ этилган бир қатор янги қоидалар борасида тўхталиб ўтди ва ҳакамларнинг бу борадаги малакаларини ошириш борасида бир қатор семинарлар ва амилий машғулотлар ташкил этилишини таъкидлади. Шунингдек, йиғилиш давомида ўтган мавсум якунларига кўра энг яхши кўрсаткичлар қайд этган ҳакам ва назоратчиларнинг баҳолари ўқиб эшиттирилди.

Таъкидлаш жоиз, ФИФА рефериси Равшан Эрматов ўтган мавсум якунларига кўра Олий Лига ва халқаро майдонда фаолият олиб борган ўзбекистонлик энг яхши ҳакам сифатида яна бир эътироф этилди ва унга Ўзбекистон Футбол Федерациясининг махсус соврини топширилди. Равшан Эрматов бригадасида ишлайдиган қанот ҳаками Адбуҳамидилло Расулов эса йилнинг энг яхши лайнсмени деб эътироф этилди ва унга ҳам махсус соврин топширлгани ҳақида аввалроқ хабар берган эдик.

Ўзбекистон Чемпионати – 2016, Ўзбекистон Биринчилиги ҳамда Ўзбекистон Кубоги баҳслари учун тасдиқланган ҳакамлар ва назоратчилар рўйхати билан сайтнинг "Хужжатлар" бўлимидаги махсус файлни юклаб олиш орқали танишиш мумкин.