Отабек Ғуломхўжаев: "Ҳожимат Эркинов легионер бўлишга тайёр эди"

21 ёшли вингер фаолиятини Москванинг "Торпедо" жамоасида давом эттиради. Бу борада эксперт сифатида ёшлар мураббийи Отабек Ғуломхўжаевнинг фикрлари билан қизиқдик.

"Йигитларни ўзига ҳам айтдим. Осиё Кубогида муваффақиятли иштирок этишди. Париж Олимпиадасига тайёрланаётган жамоа Осиё Кубоги орқали катта тажриба орттирди. Ҳожимат Эркинов, Ҳусайн Норчаев, Жасур Жалолиддиновга президентимизнинг берган эътибори яхши бўлди. Қолган футболчилар ҳам шунга қараб интилишади. Ҳожиматни кетишига келсак, кўриниб турибдики, даражаси Ўзбекистон чемпионати даражасидан ўсган. У билан кўп мулоқот қиламан. Пул ишлаш бўйича унда зўр таклифлар бор эди. Устозлари билан маслаҳатлашиб, пулни эмас, трамполинни, футболчи сифатида ўсадиган клубни танлади. Муҳими, у ерда ўйинини топиб олиб, 1-2 йилда кўзга кўринадиган ҳолатга келиши керак. Россия чемпионати ажойиб танлов.

Ўйлайманки, менталитетга кўникиб кетади. Табиатан оғир-босиқдек кўринади. Биринчи мураббийи Станислав Кудряшов бўлган. Мослашишда, тилда муаммо бўлмайди. Жуда киришимли бола. Кетишидан олдин президент қўлидан медаль олиш катта мотивация беради. Масъулиятни ҳис қилади. 

Хожимат индивидуал кучли футболчи. Йўқ жойдан ўйинни кучайтиради. Жамоавий ўйин чиқмаган паллада индивидуал ҳаракатлари билан натижа келтира олади. Унинг учун хурсандман. Қайсидир маънода Ҳожимат легионер бўлишга тайёр эди", – деди мутахассис.