Осиё Кубоги превьюси. Қирғизистон - Филиппин

Дубайдаги "Рашид" стадионида Қирғизистон терма жамоаси Филиппинга қарши баҳс олиб боради.

Гуруҳдаги вазият

Ҳар иккала жамоа аввалги иккита ўйинда мағлубиятга учраб ноль очко билан охирги ўринни эгаллаб турибди. Бугунги ўзаро тўқнашувда ким ғалаба қозонса, учинчи ўрин билан кейинги босқичга чиқиш имконига эга бўлади.

Ўйиндан олдинги фикрлар

Александр Крестинин (Қирғизистон бош мураббийи): "Биз гуруҳдаги охирги баҳсга тайёрмиз. Филиппинни ҳурмат қиламиз, бироқ бу жамоадан қўрқмаймиз. Ушбу баҳс нақадар муҳим аҳамиятга эга эканини бутун жамоа бирдек тушуниб турибди".

Свен-Горан Эрикссон (Филиппин бош мураббийи): "Имконият бор экан, охиригача курашамиз. Ўйлайманки, бу ўйинда йигитлар бор кучларини бериб ҳаракат қилишади. Бунга 100 фоиз ишонаман. Ҳозирча ҳисобимизда умуман очко йўқ ва бундан жуда хафамиз".

Қизиқарли маълумотлар

- Бу Қирғизистон ва Филиппин ўртасида Осиё Кубогидаги илк тўқнашув бўлади.

- Қирғизистон аввалги иккита ўйинда рақиблар дарвозаси томон 22 бор зарба бериб, шундан фақат биттасида гол уришга эришди.

- Ҳар икки жамоа Осиё Кубоги мусобақасининг дебютантлари ҳисобланади.