Сайтимиз журналисти Абдулазиз Искандаров бугунги кунда Косово чемпионати вакили “Дренича” жамоасида ишлаётган мутахассис билан боғланди ва бир қатор саволларга жавоб олди.
— Томас, 2012–2013 йиллар давомида “Бунёдкор” клубида муайян давр мобайнида фаолият юритгансиз. Ўшанда ўзбек футболининг қайси жиҳатлари сизни энг кўп ҳайратда қолдирган ва аксинча, нималар бироз ранжитган?
— “Бунёдкор” клубида ўтказган даврим мен учун ҳар томонлама жуда ижобий ва ниҳоятда ҳаяжонли бўлган эди. Бу лойиҳа ортидаги улкан мақсад ва режалар бор эди. Клуб келажакка пойдевор қўйиш ва барқарор тизим яратиш йўлида аниқ стратегияга эгалигини кўргандим. Менда ушбу ривожланиш жараёнига, айниқса, асосий таркиб, ёш истеъдодлар ва мураббийлар штаби ўртасидаги боғловчи бўғин сифатида ўз ҳиссамни қўшиш имконияти пайдо бўлди.
Инфратузилма соҳасидаги ўзгаришлар ҳам кишида катта таассурот қолдирарди. Янги стадион барпо этилиши, барча шароитларга эга замонавий академиянинг ташкил этилиши клубнинг юксак амбицияларидан далолат эди. Бу ерда узоқ муддатли истиқболни кўзлаб сармоя киритилаётганди — бундай тизимли ёндашувни ҳар ерда ҳам учратавермайсиз.
Саволингизнинг иккинчи қисмига келсак, тўғрисини айтсам, у ерда мени ранжитган бирор ҳолат бўлмаган дея оламан. Аксинча, мен ўзбек футболида юқори иштиёқ, катта мақсадлар ва профессионализмни кўрганман. Инсонлар янгиликка очиқ, ўрганишга чанқоқ ва футболга чин дилдан меҳр қўйган эдилар.
— 2012 йил “Бунёдкор” ОЧЛ Шарқ минтақасида кутилмаган натижалар қайд этган эди…
— Ҳа, эсимда. Ўзига ҳос ажойиб давр бўлган. Натижа шунчаки зўр эди.
— “Бунёдкор” клуби ўзининг бой тарихи ва кучли академияси билан машҳур. Сиз ишлаган даврда жамоа ичидаги муҳит қандай эди ва ёш футболчиларнинг салоҳиятини қандай баҳолагансиз? Улардан биронтасини Европа клубларига тавсия қилганмидингиз?
— Жамоа ичидаги муҳит юқори даражада профессионал бўлиши билан бирга, худди аҳил оилани эслатарди. Хусусан, мураббийлар штабидаги ҳамкорликни жуда ижобий хотиралар билан эслайман. Биз бир-биримизни ҳам касбий, ҳам инсоний жиҳатдан мукаммал тўлдириб турардик, фикр алмашинувларимиз эса доимо ўзаро ҳурмат асосида, конструктив руҳда кечарди.
Менинг вазифамнинг муҳим қисми — ёш иқтидорларни асосий жамоага интеграция қилишдан иборат эди. “Бунёдкор”да катта салоҳиятга эга жуда қизиқарли ёш футболчилар бор эди. Ўша пайтдаёқ кўплаб ёшларнинг техник жиҳатдан яхши шакллангани ва тактик кўрсатмаларни тез ўзлаштира олиши яққол кўриниб турарди.
Афсуски, клубдаги фаолиятим уларнинг Европага трансфер қилиниши учун тизимли пойдевор яратиш ёки аниқ қадамларни амалга оширишга озгина камлик қилди. Шунга қарамай, айрим футболчиларнинг вақти келиб халқаро майдонда янада юқори даражага чиқа олишига ишончим комил эди.
— Жаҳон чемпионати иштирокчилари сони 48 тага етказилгани йиллар давомида мундиал остонасида тўхтаб қолган Ўзбекистон каби терма жамоаларга қанчалик адолатли имконият тақдим этди? Бу кенгайиш турнир сифатига салбий таъсир кўрсатмайдими?
— Мусобақада иштирокчилар сонининг ортиши, табиийки, ўйинлар сони кўпайишини англатади — яъни миқдор ошади. Тажриба шуни кўрсатадики, бунинг натижасида баъзан сифатга путур етиши мумкин. Шунга қарамай, мен бу ислоҳотга икки ёқлама ёндашаман.
Кичикроқ федерациялар ва эндигина юксалиб келаётган футбол мамлакатлари учун бу дунё футболининг энг йирик саҳнасида ўзларини кўрсатиш учун улкан имкониятдир. Йиллар давомида Жаҳон чемпионати йўлланмасига бир қадам қолганда тўхтаб қолган Ўзбекистон каби давлатлар, ниҳоят, ўз ривожланиш даражасини халқаро миқёсда намойиш этиш ва балки катта сенсациялар қайд этиш учун реал имкониятга эга бўлмоқдалар. Менимча, Ўзбекистон Жаҳон чемпионати йўлланмасини мутлақо ҳаққоний тарзда қўлга киритди ва бу ерда уларнинг энг асосий сюрпризлардан бирига айланиш учун салоҳияти етарли.
Бошқа томондан, етакчи футбол мамлакатларига бўлган босим янада ортади. Улар кўпроқ ўйин ўтказишлари керак, хато қилишга ҳақлари деярли йўқ ва улардан кутилаётган натижалар жуда юқори. Натижада, турнир бутунлай янгича динамика касб этиши мумкин.
- Ўзбекистон терма жамоаси бу мусобақада дебют қилади. Бундай босимга тайёр бўлиш учун нима талаб қилинади?
- Авваламбор бир ҳақиқатни тан олиш керак: Ўзбекистон Жаҳон чемпионати йўлланмасини мутлақо ҳаққоний тарзда қўлга киритди. Сўнгги йилларда мамлакатда футбол жуда ижобий суръатларда ривожланиб бормоқда.
Ушбу машаққатли йўлни диққат билан кузатиб борган инсон сифатида шуни айта оламанки, терма жамоа ўйинида тинимсиз ўсиш кўзга ташланмоқда. Бугунги кунда кўплаб ўзбек футболчилари хорижнинг топ-клублари билан шартнома имзолаган ёки халқаро майдонда катта тажриба тўплашга улгурган. Бу эса, ўз навбатида, жамоанинг умумий савияси ва майдондаги ўзига бўлган ишончида яққол акс этмоқда.
Албатта, Жаҳон чемпионати — бутунлай бошқа даража. У ердаги рақобат, ОАВнинг эътибори ва айниқса, руҳий босим Осиё саралаш босқичидагидан тубдан фарқ қилади. Эндиликда бош омил — жамоанинг мана шундай янги муҳитга қандай мослаша олишига боғлиқ бўлади. Шу билан бирга, мен Ўзбекистон миллий терма жамоасида мазкур мусобақанинг энг асосий сюрпризларидан бирига айланиш учун етарлича салоҳият кўрмоқдаман.
Яна бир жиҳатни унутмаслик лозим: бугунги кунда Осиё жамоалари жуда жозибали, тезкор ва тактик жиҳатдан ранг-баранг футбол намойиш этишмоқда. Бу эса уларни кутилмаган ва ҳар қандай рақиб учун ноқулай жамоага айлантиради.
— Германия терма жамоаси 2014 йилги Жаҳон чемпионлигидан сўнг, кетма-кет иккита мундиалда гуруҳдан чиқа олмади. Қизиғи, улар бир сафар Кореяга, кейингисида Японияга имкониятни бой беришди. Бу йилги Жаҳон чемпионатидан нималар кутяпсиз?
— Менимча, бу сафар немислар учун ижобий ўзгаришлар сезилмоқда. Германия ҳар қандай йирик турнирда доимо чемпионликка даъвогар ҳисобланиши кeрак.
Ҳозирги жамоа анча барқарор ва умумий жиҳатдан яхши мувозанатлашгандек таассурот қолдирмоқда. Таркибда тажриба, маҳорат ва ғалабага бўлган чанқоқликнинг уйғунлиги яна яққол кўзга ташланяпти. Агар жамоа ичидаги мана шу баланс тўғри сақланиб қолса ва футболчилар ўзларининг бор салоҳиятларини намойиш эта олишса, менимча, камида ярим финалга қадар етиб бориш реал вазифа ҳисобланади. Бу эса аллақачон жуда салмоқли натижа бўларди. Айни пайтда Германияда йирик турнир олдидан мухлисларнинг катта жўшқинлиги сезилмоқда.
Шу билан бирга, рақибларни, айниқса, Осиё жамоаларини асло камситиб бўлмайди. Япония ва Жанубий Корея каби мамлакатлар сўнгги йилларда ҳар қандай рақиб учун қанчалик ноқулай эканликларини исботлаб бўлишди. Уларнинг тезкор, жозибали ва тактик жиҳатдан мослашувчан футболи мунтазам равишда ҳатто энг топ-терма жамоаларни ҳам жиддий қийинчиликларга дучор қилмоқда. Умуман олганда, Осиё жамоалари ҳозир жуда хавфли ва кутилмаган рақибга айланишган.
