"Оқ-тепа"нинг рекорди ёки "Ғаллакор-Автомобилчи"нинг антирекорди

Тошкентнинг "Оқ-тепа" жамоаси ўз майдонида "Ғаллакор-Автомобилчи"ни қабул қилди. Айтиш лозимки шу куни мезбонлар рақибини ортиқча аяб ўтирмади. Бошқача айтганда тошкентликлар яратилган имкониятларнинг деярли барчасидан унумли фойдаланиб қолишга уринди. Моддий жиҳатдан қийинчиликларга дуч келган "Ғаллакор-Автомобилчи" шу куни ўз дарвозасидан нақд 10та (!) тўп ўтказиб юборди. Биринчи бўлимнинг ўзида 4та гол урган "Оқ-тепа" футболчилари иккинчи бўлимда ҳам сермаҳсул ўйин кўрсатиб, яна 6 бор рақиб дарвозабонини ранжитишга эришди. Бу билан Фурқат Эсонбоев бошқарувидаги "Оқ-тепа" рекордни янгилади. Ёдингизда бўлса, жорий мавсумнинг биринчи босқич доирасидан ўрина олган "Шўртан"  "Ғаллакор-Автомобилчи" баҳсида ғузорликлар рақиб дарвозасига жавобсиз 9та тўп киритишга эришганди. Шундан буён ҳеч бир жамоа ундан ортиқ гол ура олмай келаётганди. Кеча пойтахт жамоаси 10та тўп киритиб, ушбу рекордни янгилашга эришди. Кўрамиз кейинчалик бундан ҳам ортиқ гол ура оладиган жамоалар топилармикин.  

Дарвоқе, пайқаган бўлсангиз "Шўртан"нинг рекорд қайд этишида ҳам айнан "Ғаллакор-Автомобилчи" сабаб бўлганди. Ғузордаги ўйинда 9та гол ўтказиб юборган ғаллаоролликлар кеча ушбу қора анънасини давом эттириб, антирекордини янгилади. Наҳотки бу жамоанинг ҳимоя чизиғи шунчалик бўш ўйнаётган бўлса. Ёки дарвозабони ҳақиқатдан ҳам кучсизми? Билмадик...