Олий лига. 11-тур рамзий терма жамоаси

Сайтимиз ижодкорлари билан келишган ҳолда рамзий термани тузиб чиқдик. Бу сафар энг яхшилар қаторидан “Нефтчи”, “Пахтакор”, “Насаф”, “Локомотив”, “Сўғдиёна”, “Машъал”, “Қизилқум”, “Бунёдкор”, “Олмалиқ” клубларида тўп тепаётган футболчилар ўрин олди. Айрим сабаларга кўра, “Навбаҳор”, “Андижон”, “Металлург”, “Бухоро” ва “Динамо” жамоаларидан ҳеч ким тур рамзий термасига киритилмади.



ДАРВОЗАБОН
Ғайрат Ҳасанов (“Нефтчи”)
Бу сафар турнинг энг яхши дарвозабони деб “Нефтчи” посбони Ғайрат Ҳасановни топдик. Тошкентда “Бунёдкор” билан кечган баҳсда Ҳасанов ўз дарвозасини яхши қўриқлади. Жамоасини гол бўладиган учта яққол вазиятдан қутқариб қолди. Қолаверса, ўзини жамоа етакчиси сифатида ҳам кўрсата олди.




ҲИМОЯЧИЛАР
Александр Мерзляков (“Пахтакор”)
Ҳамза Каримов (“Насаф”)
Ислом Тўхтахўжаев (“Локомотив”)

Бу турда уч нафар ҳимоячи бошқаларга нисбатан ажралиб турди. Булар - Александр Мерзляков, Ҳамза Каримов ва Ислом Тўхтахўжаев. Мерзляков “Металлург” билан кечган баҳсда ҳам гол урди, ҳам голли узатмани амалга оширди. Ҳамза Каримов сафарда “Қизилқум”га қарши учрашувда гол урган Игорь Таранга тўпни етказиб берди. Қолаверса, ўзи ҳам бир неча бор ҳужумларга қўшилди. Бу турда “Локо” етакчиларидан бири Ислом Тўхтахўжаев ҳам тўп киритишга муваффақ бўлди.



ЯРИМ ҲИМОЯЧИЛАР
Сардор Эминов (“Сўғдиёна”)
Мирзоҳид Ғофуров (“Машъал”)
Фаррух Ҳайдаров (“Қизилқум”)
Дилшод Жўраев (“Бунёдкор”)
Александр Алимпиевич (“Олмалиқ”)

11-тур рамзий термасидан беш нафар ярим ҳимоячи жой олди. Сардор Эминов “Андижон” дарвозасига иккита тўп киритган бўлса, Мирзоҳид Ғофуров Муборакдаги беллашувда ажралиб турди. У чап қанотда фаол ўйин кўрсатди. Равшан Ҳайдаров кашф қилган ўйинчилардан бири Фаррух Ҳайдаров “Қизилқум” - “Насаф” беллашувида чиройли ўйин кўрсатди.

“Бунёдкор”нинг таянч ярим ҳимоячиси Дилшод Жўраев ҳам бу турда яхши ҳаракат қилган. У аввалги ўйинларда кўпинча рақибларга қўполлик ишлатиш билан ажралиб турарди. Аммо “Нефтчи” билан кечган учрашувда “тоза” ўйнашга ҳаракат қилди. Рақиб дарвозаси томон икки-уч марта зарба ҳам берди. “Олмалиқ”нинг универсал футболчиларидлан бири Александр Алимпиевич эса бу турда иккита гол уришга муваффақ бўлди. Ва унинг голлари жамоага навбатдаги уч очкони тақдим этди.



ҲУЖУМЧИЛАР
Зоҳир Қўзибоев (“Машъал”)
Рўзимбой Аҳмедов (“Нефтчи”)

Ҳужум чизиғидан Зоҳир Қўзибоев билан Рўзимбой Аҳмедов ўрин олди. Ва ниҳоят 11-турга келиб “Машъал” уйдаги илк ғалабасини нишонлади. “Навбаҳор”га қарши беллашувда ҳисобни очиш Зоҳир Қўзибоевга насиб этди. Шу пайтгача фаолиятини биринчи лигада ўтказган Қўзибоев секин-аста олий лигада ҳам ўзини кўрсата оляпти. Бу гол Зоҳирнинг олий лигадаги бешинчи голи бўлди.

Ўтган турда гол урган Рузимбой Аҳмедов бу сафар тўп кирита олмаган бўлса-да, “Бунёдкор” билан кечган баҳсда яхши ўйин кўрсатди. У ҳужумда бир ўзи ҳаракат бўлишига қарамай, “Бунёдкор” ҳимоячиларига етарлича ташвиш келтира олди. Қолаверса, сўнгги дақиқаларда “Нефтчи” томонидан урилган голда ҳам Рўзимбой иштирок этди.



БОШ МУРАББИЙ
Мурод Исмоилов (“Нефтчи”)
Рамзий терма жамоага бош мураббий этиб “Нефтчи” устози Мурод Исмоиловни танладик. Яхши биласиз, Тошкентда “Бунёдкор”дан очко олишни ҳар ким ҳам уддалай олмайди. Аммо “Нефтчи” бир очко олишни уддалади. Албатта, қўлга киритилган дурангда Мурод Исмоиловнинг ҳам ҳиссаси катта. Мурод Музаффарович бошчилигидаги жамоа ушбу мавсум ёмон ўйин намойиш этмаяпти. Фақат натижалар борасида бироз оқсаяпти, холос. Ўйлаймизки, “Нефтчи” ўзини тўлиқ тиклаб олиши учун ҳали бироз вақт керак бўлади.