ЎФА спорт журналистларини байрам билан табриклади

Ушбу сана дунё бўйлаб спорт соҳасида фаолият олиб бораётган журналистлар ўртасида кенг нишонланади. Шу муносабат билан бугун оммавий ахборот воситалари вакиллари Ўзбекистон футбол ассоциациясига таклиф этилди.

ЎФА раҳбарияти журналистларни байрам билан табриклаб, тезкорлик ва холислик билан фаолият олиб боришларида омад ва зафарлар тилади. Ўз навбатида ЎФА биринчи вице-президенти Равшан Эрматов сўзга чиқиб, журналистлар футболни кенг ёритиб бориш, таҳлил қилиш, керак жойда эса танқид қилиш, камчиликларга кўзгу тутиш орқали шубҳасиз, футбол ривожига улкан ҳисса қўшиб келаётганлигини алоҳида таъкидлади. 

"Тезкорлик, ҳолислик, таҳлил, тўғрисўзлик, жонкуярлик борасида айнан спорт журналистлари соҳада етакчилар ҳисобланишади. Касбингиз қанчалик машаққатли ва синовларга бой эканлигини яхши биламиз, буни қадрлаймиз. Энг аввало, сизга мустаҳкам соғлиқ тилаймиз, ижодий фаолиятингизда илҳом, куч-қувват ва шижоат тарк этмасин, футболимиз ривожи йўлида доимо елкама-елка фаолият олиб бориш насиб этсин", – деди Равшан Эрматов.

Йиғилиш якунида ЎФА ташкил этган тадбирларни ва терма жамоалар фаолиятини мунтазам ёритиб боришда яқиндан ҳамкорлик қилганлиги ҳамда Республикамизда футбол оммавийлигини ошириш ва соғлом турмуш тарзини аҳоли орасида кенг тарғиб этганлиги учун журналистларга миннатдорчилик сифатида махсус совғалар тақдим этилди.