Нозим Муллаохунов: “Ҳимоямизда муаммолар бор”

Нозим Муллаохунов бошқарувидаги “бўёқчилар” “А” гуруҳида икки ўйин ўтказиб, ҳар иккисида ҳам мағлубиятга учради. Кеча “Пахтакор-2”га қарши ўйиндан сўнг Муллаохунов билан суҳбатлашдик.

- Ҳозир олдимизда турган энг асосий вазифа бу – чемпионатга муносиб тайёргарлик кўриб, курашчан жамоа шакллантиришдир. Албатта ПФЛ Кубогида шунчаки иштирок этмаяпмиз. Натижа ҳам керак. Йиғинимизга “Андижон”дан 3-4 нафар ўйинчи келиб қўшилган. Уларнинг бари маҳаллий йигитлардир. Футболчиларни олий лигада ўйнаб кетиши учун йўл очиб беришимиз керак.

- Турнирдаги ортда қолган 2 турдан кейин айтингчи, жамоа ўйини қай тариқа шаклланиб бормоқда?
- Гуруҳда иккита ўйин ўтказиб мағлубиятга учраган бўлсакда, йигитларга жиддий эътироз йўқ. Негаки биз курашиб енгилдик. “Машъал”га қарши баҳсда ҳам рақибга жиддий қаршилик кўрсатдик деб ўйлайман. Бугун эса “Пахтакор” иродали ғалабага эришди. Камчиликлар ҳам йўқ эмас. Айниқса ҳимоячилар билан жиддий ишлашимиз кераклиги кўзга ташланди. Умид қиламанки чемпионатга қадар камчиликарни бартараф этамиз.

- ПФЛ Кубоги мусобақаси “УзДонгЖу” учун қанчалик фойдали?
- Ушбу турнирда биринчи лига жамоаларидан ташқари элита вакиллари ҳам иштирок этади. Табиийки бу биз учун фойдадан холи эмас. Рақибларнинг савияси қанчалик юқори бўлса, камчиликларингизни шунчалик яхши билиб олишингиз мумкин бўлади. Менимча бу турнир қолган жамоалар учун ҳам фойдали бўлса керак.

- Жамоангиз Тошкентда қачонгача йиғин ўтказади?
- бу кўпроқ ПФЛ Кубогидаги юришимизга боғлиқ. Албатта натижалардан келиб чиқиб, иш тутамиз. Балки гуруҳдаги 3-ўйинни ўтказиб, сўнгра ортга қайтармиз.

- Олиб борилаётган селекция ишларидан қанчалик кўнглингиз тўлмоқда?
- Юқорида айтиб ўтганимдек, вилоятимизнинг бош жамоаси “Андижон”дан 4 нафар футболчи сафимизга келиб қўшилган. Албатта уларнинг фойдаси тегади деган умиддаман. Бизни ташвишга солаётган жиҳат, ҳимояда муаммолар борлигидир. Лекин энди бошқа ўйинчи таклиф этмаймиз. Маҳаллий ўйинчилар эвазига жамоа тузишни мақсад қилганмиз. Буни айни пайтдаги йигитларга тушунтириб, уларни тайёрлаб борамиз.

- Жамоа таркибига эътибор қаратадиган бўлсак, бу йил ёш борасида нисбатан бироз каттароқ кўринмоқда...
- Агар эътибор бераётган бўлсангиз, биринчи лига жамоалари ҳам таркибни кучайтирмоқда. Бу йил ўйинлар осон ўтмаслиги аниқ. Ҳозирча чемпионатни қандай тизимда ўтиши маълум бўлмаган эрсада, қизиқарли бўлишига умид қиляпмиз. Бу йил ҳам чемпионатда муносиб иштирок этмоқчимиз. Шунинг учун андижонлик биринчи лига тоифасида тажрибали бўлган ўйинчилар ҳисобига таркибни кучайтиришни лозим топдик.

- Чизиқлар бўйича олиб айтадиган бўлсак, асосий муаммо ҳимоя бўлиб турибдими?
- Ҳа. Марказий ҳимоячилардан кўнгил тўлмаяпти. Бунгача ўтказилган назорат ва расмий ўйинларда мудофаа чизиғи вакиллари ўзини унчалик ҳам кўрсата олишмади. Ёш борасида олиб айтадиган бўлсак, бизнинг ҳимоя ёш. Шунинг учун бу борада кўпроқ ишлаяпмиз.

- Таркибга янги келиб қўшилган футболчиларнинг тадқири нима бўлди?
- Чемпионат стартига қадар олдимизда икки ой вақт бор. Ўтказилаётган учрашувлар орқали уларни текшириб боряпмиз. Яқин бир ой ичида янги ўйинчилар борасида аниқ бир тўхтамга келамиз.

Исломбек Рустамбеков суҳбатлашди.