Никита Павленко: "Гол урилган вазиятда омадим ҳам келди"

"Янги мавсумга жиддий тарзда тайёргарлик кўраяпмиз. Кунига икки маҳалдан машғулот ўтказаяпмиз. Орада ўртоқлик учрашувлари ҳам ўтказилмоқда. Бугун "Нефтчи" билан ўйнадик. Рақиб ҳам худди биз каби жисмоний юкламалардан сўнг майдонга тушди. Яхши ўйин бўлди деб ўйлайман. Мураббийлар бир қатор футболчиларни синаб кўришди.

Голга келсак ўнг қанотдан жарима майдонига узатилган тўп шеригимнинг бошига тегиб мен турган жойга келди. Яқин масофадан тўп киритиш қийин бўлгани йўқ. Бу ҳолатда омадим ҳам келди.

Таркибимизга кучли футболчилар қўшилишмоқда. Масалан, Дарко Станоевич тажрибали ҳимоячи, Фарҳод Тожиев Ўзбекистон миллий терма жамоасида ўйнаган.

Рақобатдан қўрқмайман. Ким кучли бўлса мураббийларни айнан уни майдонга туширишади. Биз футболчилар машғулотларда тинмай меҳнат қилишда давом этишимиз керак", - дейди Павленко.