Нидерландия чемпионатида тўплар нисбати 59:4 бўлган "Аякс" иккинчи поғонада бормоқда. Қандай қилиб бунақа бўлиши мумкин?!

"Аякс" ушбу мавсумда Европанинг энг ёрқин ўйин намойиш этаётган клубларидан бири ҳисобланади. Амстердамликлар Чемпионлар лигаси гуруҳ босқчидаги 6 учрашувдан 6 тасида ғалаба қозонишган, ҳужумчи Себастьян Аллер 10 та гол билан турнир тўпурари бўлиб турибди. Нидерландия чемпионатида "Аякс" 19 ўйинда 59 та гол урди (ҳар бир ўйинда 3 тадан кўп дегани) ва атиги ТЎРТТА гол ўтказиб юборди!

"Камбюр"ни 9:0 ҳисобида таслим қилди.

19 та ўйиндан 7 таси 5:0 ҳисобида якунланди (АААААААА!)

14 ғалаба — барчаси қуруқ ҳисобда.

Шундай натижа бўла туриб, клуб "ПСВ"дан бир очко кам жамғарган ҳолда турнир жадвалида иккинчи ўринда бормоқда. Қандай қилиб бунақа бўлиши мумкин дея ҳайратдан йқа ушлаётгандирсиз.

Балки "Аякс" "ПСВ" билан ўйинда мағлуб бўлгандир? Йўқ, ўзаро баҳсда Эрик тен Хаг шогирдлари азалий рақибини 5:0 ҳисобида тор-мор келтиришди.

Аслида, ҳамма нарса оддий: унчалик хушчақчақ бўлмаган ПСВ (тўплар фарқи 47:24) амстердамликлардан ғалабалари биттага кўпроқ ҳамда "Аякс"дан камроқ дуранг қайд этган. "Аякс"да иккита мағлубият ҳам бор (Утрехт ва АЗдан қабул қилинган).

Мана футбол қай даражада қизиқарли!