Неъматилло Қуттибоев: "Йирик ҳисобда ғалаба қозонган бўлсак ҳам камчиликларимиз йўқ эмас"
04 апр 12:11
Янгиликлар

Неъматилло Қуттибоев: "Йирик ҳисобда ғалаба қозонган бўлсак ҳам камчиликларимиз йўқ эмас"

Про лиганинг 1-туридан ўрин олган "Арал" – "Жайхун" (4:0) учрашувидан сўнг мезбонлар бош мураббийи Неъматилло Қуттибоев матбуот анжуманида иштирок этди.

- Ўйин ҳақида

- Про лиганинг очилиш ўйин бўлгани боис дастлабки дақиқаларда ҳаяжон сезилди. Кейинчалик яхши мослашиб кетдик, ўйиндаги устунликни ҳам ўз томонимизга оғдира олдик. Йирик ҳисобда ғалаба қозонган бўлсак ҳам камчиликларимиз йўқ эмас. Вазиятларни якунлашдаги самарадорлик бўйича янада кўпроқ ишлаймиз.

- "Жайхун" жамоаси ҳақида фикрингиз қандай?

- Биринчи навбатда, "Жайхун" жамоасига бугунги ўйин учун рахмат айтаман. Жамоанинг таркиби ёш футболчилардан иборат. Шундай бўлса ҳам улар биринчи бўлим давомида жиддий қаршилик кўрсата олишди. Навбатдаги ўйинларда "Жайхун" жамоасига омад тилайман.

- “Арал" томонидан амалга оширилган трансферлардан қониқдингизми?

- Таркибни кучайтириш мақсадида қатор маҳоратли ва Суперлигада ўйнаган футболчиларни жалб этдик. Назаримда, бугун улар ёмон ўйнагани йўқ. Иккинчи бўлимда ўйинга қўшилган Исмоилов ҳам вазиятларни яхши ҳис қилди. Синдаровга ҳам олдинги чизиқда имконият берамиз.