"Нефтчи": Янги футболчилар таништирилди ФОТОГАЛЕРЕЯ

Тадбир аввалида Маданият саройи хонандалари томонидан концерт дастури тақдим этилди. Концерт йиғилган мухлисларга бир олам қувонч бахшида қилди.

Шундан сўнг "Нефтчи"ни Туркиядаги йиғин доирасида ўтказган ўртоқлик учрашувларини жамланмаси видео ролик ҳолида мухлисларга тақдим этилди. Бу видео роликдан йиғилганлар бир олам таассуротлар олдилар.
Сўнгра тадбирнинг асосий қисми бошланди. Тадбирни "Рухсор" ТРК бошловчиси Хайрулло Йўлдошев олиб борди.

Тадбирда янги ўйинчиларни таништириш учун бир қанча меҳмонлар ташриф буюришди. Шулар қаторига Фарғона шаҳар ҳокими, ФНҚИЗ Касаба қўмитаси раиси, Фарғона Футбол Федерацияси вице-президентлари ўз тилаклари билан қатнашдилар.

Дастлаб "Нефтчи'' клуби раиси Тохир Кападзе сўзга чиқиб, йиғилганларни келаётган янги мавсум билан табриклаб ўтди. Жамоа бу йил юқори ўринлар учун курашишга тайёрлиги ҳақидаги нутқи барчага манзур бўлди.

Бирин-кетин сўзга чиққан меҳмонлар мавсум жамоага омадли келишини тилаб ўтдилар.

Тадбирнинг кейинги қисмида янги ўйинчиларга футболкалар тақдим этилди.
Евгений Черемесин - 30, Сергей Смородин - 1, Шукурали Пўлатов - 3, Бахтиёр  Ёқубов - 6, Мансур Саидов - 7, Ойбек Нурбойев - 4, Отабек Ҳайдаров - 11, Зокиржон Нурматов - 13, Камрон Кападзе - 24, Аббос Махсталиев – 38-рақамли футболкаларда тўп тепадиган бўлишди. Тадбир сўнггида клуб раҳбарияти ва мухлислар ўртасида савол-жавоб ўтказилди.

Комилжон Икромов
Фарғона шаҳридан