Фарғоналиклар айни вақтда бирйўла уч фронтда кураш олиб бораётганидан хабарингиз бор. Бу эса ўз навбатида тақвимда қатор мураккабликлар келтириб чиқарган. Элит Чемпионлар лигасида муносиб иштирок этишни мақсад қилган “Нефтчи” “Бунёдкор” билан Суперлига доирасидаги учрашувни суриш орқали футболчиларнинг тикланиш жараёнини нисбатан енгиллаштиришга қарор қилди. Ўз навбатида “Бунёдкор” рақиб томонидан билдирилган таклифга розилик билдирди.
Қайд этиш керак, ФИФА кунларини инобатга олмаса, “Нефтчи” клубининг кўчирилган ўйини учун тақвимда бўш жой мавжуд эмасди. Шундан келиб чиқиб клуб Ўзбекистон миллий терма жамоасининг ноябрь ойидаги йиғинига эҳтимолий жалб этилиши мумкин бўлган футболчиларсиз ҳам Бунёдкорга қарши майдонга тушишга кафолат берди.
“Бунёдкор” клубидаги иқтисодий ҳолатдан келиб чиқиб, “Нефтчи” U-21 жамоалари ўртасидаги учрашув учун Тошкентга ташриф буюриш борасидаги рақибининг таклифини қабул қилди. Мазкур беллашув 28 октябрь куни Тошкентда бўлиб ўтади.
