"Навбаҳор": Назорат ўйинида "Сўғдиёна" ғолиб

"Дўстлик" ўйингоҳида кечган беллашув Даврон Файзиев шогирдларининг иродали ғалабаси билан якун топди.

Дастлаб Равшан Бозоров бошчилигидаги "лочинлар" учрашувда тезкор гол уришга муваффақ бўлишди. Абдумалик Абдуллаев учрашувнинг учинчи дақиқасидаёқ жиззахликлар дарвозасини ишғол этишни уддалади. Аммо кейинчалик "Сўғдиёна" ҳисобдаги мувозанатни тиклади. Биринчи бўлимгача шу ҳисоб сақланиб қолди.
Иккинчи бўлимда ҳужумчимиз Влдаислав Алексиннинг урган голини ҳакамлар ҳисоблашмаганини эътироф этиш лозим. Ён ҳакам бу вазиятда футболчимиз ўйиндан ташқари холатда қолганини кўрсатган. Бироздан сўнг рақиб Акмал Ортиқов қўриқлаган дарвозага йўл топди, 1:2. Баҳс якунланишиб бораётган бир паллада жиззахликлар Ортиқов қўриқлаган дарвозани яна ишол этишга муваффақ бўлишди. Шу тариқа "Сўғдиёна" назорат учрашувида жамоамиз устидан ғалабага эришди. Бугун "NBU-Осиё" жамоаси билан ҳам "Навбаҳор"нинг навбатдаги назорат ўйини бор.

"Навбаҳор" учрашувни қуйидаги таркибда бошлади: Артур Парванов, Мурод Тўйчибоев, Дилшод Жабборов, Қаҳрамон Маҳаммаджонов, Тоҳир Шамситдинов, Аъзам Алиев, Азиз Турғунбоев, Ислом Исоқжонов, Алишер Маҳмудов, Абдумалик Абдуллаев, Владислав Алексин.
Гол: А. Абдуллаев (3)
Захирадан майдонга тушганлар: Акмал Ортиқов, Доржи Сангажиев, Ғайрат Жўраев, Шохжаҳон Аббосов, Ҳожиакбар Юнусов, Билол Шарофиддинов.