"Насаф": Геворкян, Юнусов ва Муҳаммадиев билан шартнома узайтирилди

Машғулотлар жамоанинг қароргоҳидаги майдонларда, шунингдек “Марказий” ва “Геолог” стадионида ҳам ташкил этилмоқда.

Куни кеча клуб раҳбарияти футболчилар ва уларнинг шартномалари билан боғлиқ масалаларини муҳокама қилишди. Унга кўра ўтган мавсумда жамоа таркибида ҳаракат қилган ва шартномаси якунига етадиган барча футболчилар билан шартнома муддатлари узайтирилди. Жумладан, жамоамиз сардори Артур Геворкян, Илҳом Юнусов, Шуҳрат Муҳаммадиев сингари футболчилар 2014 йилги мавсумни “Насаф” таркибида бошлашлари аниқ. Айни пайтда жамоа таркибида икки нафар футболчи дарвозабон Ўткир Юсупов ва Азиз Ғуломхўжаев кўрикдан ўтишмоқда.  

Жамоамиз аъзолари Янги йилга қадар Қарши шаҳрида машғулотларни давом эттиришади. Янги ҳафтада футболчиларга чемпионат бронза медалларини тантанали тарзда топширилади ва қисқа таътил эълон қилинади.

Янги йилда “Насаф”чилар яна Қаршида тўпланиб ўқув-йиғин машғулотларини давом эттиришади ва 10 январь куни биринчи хорижий йиғинни ўтказиш учун Туркиянинг Анталия шаҳрига жўнаб кетишади. Туркияга кетиш олдидан футболчиларимиз олий лига жамоаларидан бири билан назорат учрашувини ўтказишлари режага киритилган.