Музаффар Музаффаров: Таиланд ва Малайзиядан, пойтахтнинг кучли клубидан таклифлар бўлганди, аммо...

Ҳақиқатдан ҳам иқтидорли футболчи тез орада миллий терма савиясига чиқса ажаб эмас. Хабарингиз бор, Музаффар ушбу мавсум бошида АГМК сафига бориб қўшилди. Суперлига бошланишидан олдин биз футболчи билан суҳбатлашдик.

- 3-синфлигимда “Пахтакор” академиясига қабул қилиндим. Ўшанда ота-онамдан узоқда яшадим. Бироқ муаммолар кўпайиб кетди. Ўшанда оила аъзоларим ҳам Тошкентга кўчиб келди. Мен эса Чилонзордаги “Пахтакор” академиясига жойлашдим. Отамни мураббий бўлганлиги учун ҳам қайси жамоа билан шартнома имзоласам ҳам айнан уларнинг шарофати эвазига бўлмоқда деб ўйлашади. Аммо ундай эмас. Ўз кучим билан “Сўғдиёна”да ўйнадим, АГМКга ўтдим.

- Ўтган мавсум ҳамда “Нефтчи”даги фаолиятингиз ҳақида тўхталиб ўтсангиз.
- Тўғрисини айтганда, “Нефтчи”нинг олдига юқори вазифалар қўйилганди. Вадим Абрамов жамоага бош мураббий бўлганидан сўнг, ўйин сифатимиз борасида ўсишга эришдик. Жамоа чиройли ўйнади. Бироқ ички муаммолар сабаб ишларимиз ортга қараб кетди. Омад етишмади, натижаларга эриша олмадик. Оқибатда чемпионатни аутсайдер сифатида якунладик. Чемпионатда осон ўйиннинг ўзи бўлмайди. Бизга барқарорлик ҳам етишмади.

- АГМКга ўтишингиз борасида гапириб ўтсангиз. Ким сизга таклиф билан чиқди? Бошқа жамоалардан ҳам таклифлар бўлдими?
- Бошқа давлатлардан ҳам таклифлар тушди. Сир тутмайман, мавсум олдида менга 4 клубдан шартнома имзолаш борасида номзодлар бор эди. Таиланд ва Малайзия жамоаларидан, пойтахтнинг кучли клубидан ҳам конкрет таклифлар бўлганди. Бироқ АГМК билан келишувга эришиб бўлгандим. Менга шахсан Виктор Кумиковнинг ўзи жамоага қўшилишим борасида алоқага чиқди. Аммо барибир менга АГМКнинг таклифи кўпроқ ёқди. Таиланд ва Малайзиядагилар АГМК билан музокаралар олиб боришди. Бироқ клубдагилар менга рухсат беришмади.

- Янги мавсумда жамоангиз олдига қандай вазифа қўйилган?
- 2018 йилги ўзбек футболи олдингиларидан ажралиб туради. Энди биз олий лигада эмас, Суперлигада ўйлаймиз. АГМКнинг олдига кучли олтиликка кириш вазифаси қўйилди. Шу сабабдан Туркияда икки марта йиғин ўтказдик. Бу эса янги мавсум учун тайёргарликни кучайтириш учун хизмат қилди деб айта оламан.

- Мухлисларга тилакларингиз.
- Футбол – миллионлар ўйини, фақатгина мухлислар учун ўйналади. Худо хоҳласа, янги Суперлига мавсумида томошабинлар ҳар бир стадионни тўлдиришади, деб умид қиламан. Бундан олдин ўзим ўйнаган “Нефтчи” ва “Сўғдиёна”га ҳам омад тилайман.


Миржалол Норматов суҳбатлашди