Мурод Исмоилов: "3 дақиқа ичида ғалабани бой бердик"

Унда олмалиқликлар 3:2 ҳисобида ғалаба қозонишган эди. Учрашувдан сўнг "Нефтчи" устози Мурод Исмоиловнинг фикрлари билан қизиқдик.

- Тайёргарлик давом этмоқда, ўйинчилар кучли жисмоний юкламалар остида тўп тепишди. Шунга қарамай, шогирдларим чиройли ва мазмунли ўйин намоиш этишди. Афсуски, иккита мажбурий ўзгариш беллашувга сезиларли таъсир ўтказди. Жаҳонгир Мехмонов жароҳат олиб ўзгартирилган бўлса, иккинчи бўлимда Умид Қодиров бироз чарчаб қолди ва уларнинг ўрнига тушганлар ўйинга киришиб кета олишмади. Қанотларимиз кучсизланиб қолгач, 3 дақиқа ичида иккита тўп ўтказиб юбордик. Ўйиннинг умумий суратини оладиган бўлсак, йигитларни ҳаракатларидан кўнглим тўлди, биз тўғри йўлдамиз. Насиб қилса, кейинги баҳсларда ўз ўйинимизни янада шакллантириб борамиз.

- Акмал Холматовни масаласи тўлиқ ҳал бўлдими?
- Яқин бир ярим йил давомида Акмал Холматов биз билан бирга бўлади. Бу масала деярли ҳал қилинган, яқин кунларда у билан расман шартнома имзолаймиз.

- Йиғинга чақирилганлар ҳақида нима дея оласиз?
- Шу кунгача тиббий кўрик натижаларини кутаётган эдик, бугун натижалар чиқди. Янгиларнинг ҳаммаси ундан ижобий ўтишди ва мўлжалимиз бўйича йиғиндагиларни жамоада олиб қоламиз. Тиббий кўрикдан фақатгина Дэвид Ония ўта олмади ва энди у биз билан бирга эмас.


Толибжон Қосимов суҳбатлашди