Муҳсин Низомиддинов: "Биз ҳали мақсадимизга эришганимиз йўқ"

"Ўйинга тўхталадиган бўлсам, натижа кутганимиздек бўлди. Мухлисларни ғалаба билан табриклайман. Бугун Про лиганинг охирги учрашуви эди. Энди олдиндаги 2 та плей-офф ўйинига тайёрланамиз", – дейди Муҳсин Низомиддинов. 

- "Қўқон-1912" мақсадсиз жамоага айланиб бораётгандек...

- Жамоани қабул қилиб олганимда 5 очко ортда эдик. Иккинчи даврада вазиятни ўнглашга ҳаракат қилдик. Айрим ўйинларда бироз омадимиз келмади. Суперлига сари охиригача ҳаракат қиламиз. Ҳар бир жамоада мақсад бўлади. Мақсадсиз жамоа, дейиш нотўғри. Мақсадимиз – Суперлигага чиқиш. 

- Жамоа биринчи бўлимда қандайдир суст ўйнади. Бунинг сабаби нима?

- Биринчи бўлимда кўпроқ прессинг уюштириб ўйнадик. Рақибни тўпсиз қолдиришга ҳаракат қилдик. Иккинчи таймда ўзгаришлар амалга оширилди. Ўйлаган мақсадимизга эришдик. Футболчилар индивидуал кучли, қандай ўйнашни билади, лекин жисмоний куч етишмади. Бу вазиятга тайёргарлик кўргандик. Биринчи бўлимда вазиятимиз кўп бўлди, фойдалана олмадик. Иккинчи таймдаги ҳар бир вазиятимиз гол билан якунланди. 

- Жамоа чемпионликни олиб, Суперлигага чиқишига нима етишмади?

- "Динамо" ҳам, "Локомотив" ҳам оддий жамоалар эмас. Улар билан рақобат қилиб, якунда етиб олдик, лекин омад етишмади. Кейинги ўйинларга максимал даражада тайёргарлик кўрамиз. Биз ҳали мақсадимизга етганимиз йўқ.