Мирзаҳаким Тўхтамирзаев: "Николай Озеров — мен учун андоза"

"Николай Озеров — мен учун андоза. Буни доим гапирганман, яна гапиришим мумкин. Ахбор аканинг охиратлари обод бўлсин. У кишига ва Роман Турпишевга қойил, улар ҳам зўр ишлаган.

Нима учун Озеров? Биринчидан, ҳамма спортлардан яхши хабардор эди. Иккинчидан, ҳис-ҳаяжон, эмоция кучли эди ва бошқа шарҳловчиларга нисбатан спортчига, мураббийга бўлган муносабати қойил қолдирган. 

Борис Александров деган хоккейчини бутун собиқ иттифоқ қоралаганида, битта Озеров қўллаб-қувватлаган. 19 ёшли йигит Усть-Каменогорскдан Москвага ЦСКАга олиб келинган, терма жамоа таркибидан жой олган, жаҳон чемпиони бўлган ва дискотекага бориб, кимлар биландир спиртли ичимлик ичган. Ўша ерда кимдир фотоаппаратда расмга олиб, "Комсомольская правда" газетасида чиқарган. Бутун иттифоқда ёмонлашга кимдир керак бўлгандек эди. "Комсомол шаънига доғ туширди, спортдан четлаштирилсин ва ҳоказо" деб кетма-кет мақолалар чиқарилган. Худди атайлаб кимдир уни йўқотмоқчи бўлгандек туюлган. Озеров шу боланининг тарафини олган. Спорт қўмитаси Борисни иккита ўйинга — шартли равишда мавсум сўнгигача дисквалификация қилган. Иккита ўйин ўтиб, учинчисида майдонда пайдо бўлди. Ўшанда Озеров: "Қадрли дўстлар, музда Борис Александров кўриниш берди, унинг атрофида нималар бўлаётганини яхши биласиз. Битта нарсани айтишим мумкинки, бу воқелик унга сабоқ бўлади. Бу йигит ҳали бизнинг мамлакатимизга улкан ғалабаларни олиб келади. Мен бунга ишонаман", деб айтган. Бўлмаса унга ҳеч ким эмасди, қандайдир қариндоши ҳам эмасди. 

Мен буни бот-бот такрорлашимнинг боиси шундаки, шарҳловчининг ибораси ҳал қилувчи аҳамиятга эга. Орада йиллар ўтиб Александров хоккейдаги фаолиятини тугатганида, ундан бу воқеа ҳақида қизиқиб, синмаслик учун қандай қилиб ўзида куч топганини сўрашган. У эса: "Мен синиб бўлгандим. Ота-онам хоккейни кўриб, ўйиндан кейин менга қўнғироқ қилган. Озеров сенга ишонаман деб айтди, дея воқеани сўзма-сўз айтиб берган. Ўша кундан бошлаб шу одамнинг ишончини оқлаш учун тинмай ишлаганман", деб жавоб берган", – деди устоз Мирзаҳаким Тўхтамирзаев.

"90minutuz" подкасти тўлиқ ҳолда: