Миллий терма сокин тин олди. Ўсмирлар ҳам чарчади. Эски раҳбарият янгилар билан жавлон уришга тайёрми?
25 сен 2017 12:37
Янгиликлар
![](https://championat.asia/upload/storage/279613_original.jpg)
![](/upload/storage/279613_220.jpg)
Миллий терма сокин тин олди. Ўсмирлар ҳам чарчади. Эски раҳбарият янгилар билан жавлон уришга тайёрми?
Мен кўп ачинмадим. Агар Нуралиев таркибида ёши кичрайтирилган бирорта бола йўқ бўлса, шунинг ўзи энг катта ютуқ (бунга ишонишим қийин). Тожикистон Осиё Чемпионатига чиқди, биз эса қолдик қабилида хабар ёзиб ташлайверамиз. Лекин ишонтириб айтаманки, яқин 10 йилда Тожикистон миллий термаси яқинимизга ҳам кела олмайди. Бундан кейин ҳам шундай бўлиши катта эҳтимол. Ваҳоланки планкани Тожикистон ёки ўзимиздан кучсиз бошқа термалар билан олишимиз хато. Унутинг уларни, биз юқоридагиларга интилишимиз керак.
Биз 1 йиллик циклни бой бердик. Аммо бу фожеа эмас. Ҳақиқий фожеа биз ҳали ҳам эски каром шўрвани ичишда давом этаётганимиз. Худди мана шу Нуралиев 2012 йил Ўзбекистон U16 термаси билан Осиё Чемпиони бўла олган, унинг тажрибасига шубҳа йўқ. Бироқ шахсан менга ёши “ўқланган” футболчилар билан қўлга киритиладиган ютуқ керак эмас, умуман. Орадан 5 йил ўтиб кўрмоқдамизки, эски услубдан юрганимиз фойда келтирмади. Польшага бориб Бельгия, Португалия кабилар қатнашган турнирда ўйнаганимиз, Қозоғистондаги халқаро мусобақага учиб келганимиз зое кетди, тўғрими? Чунки биз йўналишларимизни ривожлантирмадик, ўша-ўша механизмни Нуралиев яна чемпион қилиб беради деб ишондик.
Ҳа, гап марказ ҳақида. У ташкил этилганидан икки ой ўтиб ишга киришган Асқар Толибжонов, то марказ ёпилгунига қадар бош ролда бўлди. ЎФФ янги раҳбарияти катта эҳтимол билан шунга ўхшаш марказни қайта ишга туширади (нега ёпилганини айтишмаган, нега очилаётганини эса айтишади). Толибжонов ишдан кетгани ҳақида ҳеч қандай маълумот йўқ. Ваҳоланки, ўсмирлар термасининг ҳатто қитъа чемпионатига ҳам чиқа олмагани эски сиёсатга барҳам бериш кераклигини англатиб турибди. Бўлди, унинг услуби етиб келди, таг томири билан чириб кетди. Унга ҳозир Дилшод Нуралиев ҳам, бошқаси ҳам ёрдам бера олмайди.
Чунки бугун қитъанинг қолган мамлакатлари анча ўсди, улар ўз услубларини, йўналишларини такомиллаштирди. Биз эса оқимдан тушиб қолмаслик учун янги қонга муҳтожмиз. Толибжонов ўша қонни қуйиб бера оладиган ягона инсон бўлса, мен икки қўлимни кўтарамн, бошқа гапим йўқ. Майли, “Пахтакор”га қайтсин (клуб Умид Аҳмаджонов истеъфоси ҳақида расмий хабар бермади, балки ўрнига одам керакдир, балки “Пахтакор”дан кетиб улгурмагандир, билмаймиз), балки бошқа вариантлар чиқиб қолар Толибжоновга. Ҳозир эса ҳаммасини ўзгартиришнинг айни вақти. Саудиядаги натижани кўриб, хаёлимга шундан бошқа фикр келмади. Нуралиевни танқид қилиб, олиб ташлаб ҳеч нарсага эришмаймиз. У мураббий, ишини қилади. Тепароқдагилар эса яна Олимхўжаевни, яна Евстафеевни олиб келаверади. Замон эса бамаслаҳат иш қилишни, келишишни, тийилишни ва биргина шахс ваколатларини камайтириб ташлашни талаб қилади.
Хуллас, Германия ҳавасида яшайверамиз. Унинг U16 си ҳам, Лёвнинг Германияси ҳам битта рельсга тушиб олган. Бизда Нуралиев аравада йўлга чиқса, тепароқда Бабаян тепловозда кутиб олади, бошқаси яна бошқа бир фалсафани илгари суради. Толибжонов эса бу ҳақда эмас, Нуралиевнинг ўрнига кимни қўйиш ва муваффақиятсизликни қандай изоҳлашни кўрпоқ ўйлайди. Бу яхши эмас, ўртоқлар...
Ўхшаш янгиликлар
![AMP Logo](https://championat.asia/image/logo-amp.png)
Фикрлар