Марказий Осиё мамлакатларининг чемпионатлари. Сергеев жамоаси иккинчи, "Истиқлол" яна пешқадам, стартда турган Туркманистон

ҚОЗОҒИСТОН

Қозоғистон чемпионатида ҳам биздаги сингари тўртта тур ортда қолди. Натижаларга кўра, "Қизилжар" клуби максимал натижа қайд этган ҳолда 12 очко билан пешқадам бўлиб турибди. Игорь Сергеев тўп тепадиган "Тобол" жамоаси 10 очко билан иккинчи ўринда бормоқда. Кучли учликни 9 очко билан "Актобе" якунлаган. Бобир Абдихолиқов ҳамда Шаҳбоз Умаров фаолиятини давом эттираётган "Ордабаси" жамоаси ҳам 9 очко билан 4-ўринда жойлашган.

Тўпурарлар баҳсида "Актобе" ҳужумчиси Максим Самородов 4 та гол билан пешқадамлик қилмоқда. Шунингдек, Евгений Козлов (Атирау), Артур Шушененачев (Қайрат), Василий Совпель (Қайсар) ва Мирас Турлибек (Аксу)да учтадан гол мавжуд. Бобир Абдихолиқов, Шаҳбоз Умаров ва Игорь Сергеев иккитадан тўп киритган.

ҚИРҒИЗИСТОН

Қирғизистон Премьер-лигасида 1-тур учрашувлари якунланди. Дастлабки тур якунларига кўра, "Алга" пешқадам бўлиб турибди. Қўчқор-Отанинг "Нефтчи" ва "Алай" жамоалари кейинги ўринларни банд этиб турибди. Тур давомида 6 та гол турли футболчилар томонидан урилди, шу боис дастлабки турдан сўнг яққол тўпурар йўқ.

ТОЖИКИСТОН

Тожикистон Олий лигасида ҳам дастлабки тур баҳслари ўтказилди. Мамлакатнинг амалдаги чемпиони "Истиқлол" 1-турдан кейиноқ яна пешқадамга айланди. Душанбеликлар "Хўжанд" дарвозасига жавобсиз 4 та тўп киритишди. "Регар-ТадАЗ" ва "Равшан" жамоалари 2 ва 3-ўринларни банд этишди. Тўпурарлар рўйхатида "Эсхата" ҳужумчиси Бахтиёр Зарипов 3 та гол билан устунлик қилмоқда. Алишер Жалилов (Истиқлол) ва Тоҳир Малодўстов (Равшан) ҳисобида иккитадан гол мавжуд.

ТУРКМАНИСТОН

Туркманистон Юқори лигаси бугун старт олади. Чемпионатда 8 та жамоа ўзаро кураш олиб боради. Амалдаги чемпион "Ахал" клуби ҳисобланади.