Люпче Дориев: "Сўғдиёна" мусобақа жадвалида янада баландроқда бўлиши керак. Ўзбекистон кубогида ғалаба қозона олишимизга кўзим етмоқда"

- Мавсумнинг биринчи давраси якунланди. Биринчи давра ҳақида фикр билдириб ўтсангиз?

- Мавсумнинг биринчи ярми биз учун анча қизиқарли ўтди. Меҳнатимизга яраша, яхши натижага эришдик деб ўйлайман. Муҳими, шу руҳда давом этиш.

- Жамоанинг биринчи даврадаги иштирокига баҳо бериб ўтсангиз?

- Жуда яхши иштирок этдик деган фикрдаман, аммо айрим бир муддат омадимиз келмади ва ўйинимиз чиқмади. Яхши характер ва меҳнат эвазига бунга эришдик.

- "Сўғдиёна" жамоасининг мусобақа жадвалида эгаллаб турган ўрнидан қониқяпсизми?

- Учинчи ўрин яхши натижа, лекин биз янада баландроқ ўринлар учун кураша оламиз. Мусобақа жадвалидаги ўрнимизни яхшилашимиз керак.

- Суперлиганинг энг яхши тўпурари бўлиб турибсиз. Иккинчи даврада ҳам шундай темпда давом этасизми?

- Чемпионатнинг энг яхши тўпурари бўлиш мен учун шараф. Голлар ва ассистлар қайд этишда давом этишни мақсад қилганман. Жамоамнинг натижалари яхшиланишига кўпроқ ҳисса қўшиш мақсадидаман.

- "Сўғдиёна" жамоаси кутилмаганда Суперлиганинг энг яхши жамоаларидан бири бўлиб турибди. Бундай натижанинг асосий сабаби нимада?

- Биз мавсум аввалида бунга келишиб олган эдик. Асосий сабаб жамоанинг бирдамлиги ва меҳнат. Мураббийлар ва жамоадошларимнинг меҳнат меваси бу. Мухлисларимиз ҳам бизга катта ёрдам беришмоқда.

- "Сўғдиёна"нинг Ўзбекистон кубогидаги рақиби "Навбаҳор". Кубок баҳсларида ҳақида гапириб ўтсангиз? Кубокдаги режалар қандай?

- Кубок мусобақасида имкон қадар узоқроққа боришни мақсад қилганмиз. Буни уддалай олишимизга ишончим комил. Ўзбекистон кубогини юта олишимизга кўзим етмоқда.

- Биринчи даврадаги ёрқин ўйинингиз кўпчиликнинг эътиборини тортгани аниқ. Бошқа бир жамоалардан таклифлар бўлмадими?

- Мен фақатгина "Сўғдиёна" ҳақида ўйламоқдаман. Таклифлар билан шуғулланадиган инсонларим бор. Мен фақат футбол ўйнайман.

Абдулвосит Бектемиров суҳбатлашди