«Локомотив» юзинчи ғалабага яқинлашмоқда

Ўзбекистон XXIII миллий чемпионати 1-турида «Навбаҳор» меҳмони бўлган темирйўлчилар миллий чемпионатларимиз тарихида ўзларининг 251-ўйинини ўтказишди. Косонсойдаги ютуқ эса «Локомотив»нинг Олий лигадаги ҳисоб бўйича 97-ғалабасига айланди. Демак, яна учта ғалабадан сўнг «Локо»нинг Ўзбекистон чемпионатларидаги зафарли ўйинлари сони 100тага етади. Бу ҳодиса катта эҳтимол билан 4-турда содир бўлиши мумкин.

Дарвоқе, «Локомотив» яна битта юбилей остонасида турибди. Ҳужумчи Иван Нагаевнинг «Навбаҳор» дарвозасига киритган гол темирйўлчилар учун Олий лигадаги 342-тўп сифатида тарихдан жой олди. Демак, яна 8та голдан сўнг «Локомотив» киритилган голлар бўйича 350талик довонни забт этади. Шунингдек, яна икки ютуқ мамлакат вице-чемпионларига Олий лигада жамғарилган очколар сонини ҳам 350тага етказиш имконини беради. «Навбаҳор»га қарши ўйинни ҳам қўшиб ҳисоблайдиган бўлсак, Вадим Абрамов шогирдлари ҳисобида айни пайтда 344 очко борлиги ойдинлашади.