“Лочин” парвози: Кубокдаги сенсация ва Полвоновнинг қайтиши

Қарши давлат университети шарафини ҳимоя қилаётган “Лочин” жамоаси мусобақада ўзгача ҳаракатлари ва шижоати билан алоҳида эътибор қозонди. Эътиборлиси шундаки, дебютант “Лочин” жамоаси илк иштирокидаёқ ҳақиқий сенсация ярата олди. Улар гуруҳ босқичида амалдаги кубок эгаси “Андижон”ни, сўнгра “Сурхон”ни мағлуб этиб, ишончли тарзда кейинги босқичга йўл олди. Жамоа таркибида асосий эътибор ёшларга берилган бўлса-да, сафда тажриба ва маҳоратни уйғунлаштиришга уриниш ҳам кўзга ташланади. Айниқса, бутсаларини яқиндагина михга илган Зафар Полвоновнинг майдонга қайтиши жамоага алоҳида ишонч бағишлади. Фаолиятини мураббийликда давом эттираётган Полвонов энди ёшлар билан елкама-елка тўп тепмоқда. Биз эса, албатта, ундан бу қарорининг сабаблари ва жамоа келажагига оид фикрларини сўрадик.

"Лочин"ни ҳеч ким танимасди. Эндиликда жиддий қарашадиган бўлишди. Бизнинг ҳам ҳали тўхташ ниятимиз йўқ",- дея гап бошлади Зафар Полвонов.

- Қизиқ, футболчилик фаолиятингизни тугатган эдингиз. Яшил майдонга қайтишга нима туртки бўлди? "Лочин" варианти қандай чиқди?

- Тўғри, футболчилик фаолиятимни тугатган эдим. Лекин яна қайтишга қарор қилдим, чунки ўзимни футболсиз тасаввур қила олганим йўқ. Мен футболни, ўз ишимни жуда яхши кўраман. Буни Суперлигада ўйнаб фаолиятини тугатганлар қандай қийин бўлишини яхши ҳис қилишади. "Лочин" жамоасидан таклиф тушди. Клуб чорловини рад этолмадим. Тўп тепишни ўзим қаттиқ истадим. Яна яшил майдонда эканлигимдан хурсандман.

- Дебютдаёқ элита жамоаларини ортда қолдиришга қай тариқа эришилди? Гуруҳ босқичи қанчалик кутилгандек кечди?

- "Андижон"ни Суперлиганинг энг тартибли жамоаси эканлигини билардик. Уларнинг қандай тактикада ҳаракат қилиши мумкинлигини кўриб чиққандик. Очиғини айтганда, рақибни кўп ўрганганимиз самара берди. Ўйин давомида жамоамиз рақибнинг кучли томонларини зарарсизлантиришга эришишди. Бу-футбол. Кимдир ютади ёки ютқазади. "Андижон"нинг Суперлигада яхши иштирок этишига ишонаман. Яна ўз ўйинлари билан мухлисларни хурсанд қилишади. Кубокдаги ҳар бир ўйинда жамоадошларим борларини берди. Бу барчанинг меҳнати.

- Кучли жамоаларга тайёргарликда руҳий ҳолат устувор ҳисобланади... 

- Ҳаммаси футболчининг ўзига боғлиқ — қай даражада руҳий тайёргарлик кўргани, ўз устида қандай ишлаётгани ва энг асосийси, ўзига бўлган ишончини сақлаб қолиши муҳим. Мен доим шундай дейман: "Сизлар ўйнашни биласизлар ва буни муваффақиятли уддалай оласизлар".

- "Лочин" кутилмаган совғалар кўрсатишда давом этмоқчими?

- Мақсадимиз фақат олдинга интилиш. Кўзлаган мақсадимизга эришишга ҳаракат қиламиз. 

- Жамоада яна қандай вазифаларингиз бор?

- "Лочин" жамоасидаги вазифам кўпроқ гол уриш ва жамоа ғалабаларига муносиб ҳисса қўшишдир. Қолганини вақт кўрсатади.

Суратлар "Лочин" клуби расмий телеграм саҳифасидан олинди