"Ливерпуль" ва "Реал" собиқ устози Бенитес Чемпионлар Лигаси финалидан нималарни кутмоқда?

"Статистикага қарасам, "Ливерпуль" фаворит эканлиги кўринмоқда. Бироқ бир ўзига хослик бор – улар финалда ўйнашга ўрганиб қолган "Реал Мадрид" билан ўйнашади.

"Ливерпуль" сўнгги йилларда тўпга эгалик қилиш фоизини оширди, чунки уларда ажойиб ўйинчилар бор, жамоа кўпинча ўйинни назорат қилади. "Мадрид" Винисиус ёки Родриго билан кўпроқ қарши ҳужумга ўтмоқда.

Клопп қойилмақом иш қиляпти, "Ливерпул" анча яхшиланди. "Ливерпул"нинг заиф томонлари кам. Аммо "Реал Мадрид" қанотда Винисиусни ишга солиши орқали устунликка эга. Ишончим комилки, Клопп ҳам, Анчелотти ҳам бу ҳақда билади.

Мен иккала клубга ҳам боғланганман. Ким яхшироқ ўйнаса, ўша ютади. Такрор айтаман – агар рақамларга тўхталсак, "Ливерпул" бироз устундек кўринмоқда.

Лекин финалдаги "Реал" – бу ҳақиқий "Реал". Қолаверса, улар кўпроқ дам олишди, бу уларнинг устун томони", – деди испаниялик мутахассис.

Эслатиб ўтамиз, финал беллашуви 28 май куни Парижда ўтказилади.