"Ливерпуль" академияси: Сен ёлғиз эмассан

"Қизиллар"да ҳақиқатан жуда яхши футбол мактаби бор: унда Жеррард, Каррагер, Оуэн, Фаоулер ва бошқа кўплаб яхши футболчилар тарбия топган. Ҳозирда "Ливерпуль" академиясининг камида 15 нафар тарбияланувчиси Премьер-лига ва Чемпионшипда ўйнамоқда.

Лекин, албатта, тарбияланувчиларнинг ҳаммаси ҳам муваффақиятли карьерага эга эмас, кўплари футболдаги муваффақиятни кутиб ўтирмасдан, омадини бошқа соҳада синашга қарор қилган.

Мисол учун, Жордан Росситер "янги Жеррард" ҳисобланарди, аммо унинг катталар футболига бўлган йўлида жароҳатлар тўсқинлик қилди. 1 июль куни Жорданнинг "Рейнжерс" билан шартномаси тугаб, эркин агентга айланди. Росситер жорий мавсумни ижара асосида Англиянинг учинчи дивизиони вакили "Флитвуд"да ўтказди. 23 ёшли ярим ҳимоячи қишда ўзининг хочсимон пайларини узиб олди ва узоқ вақтга сафдан чиқди. Энди у август ойида майдонга қайтиб, "Флитвуд"ни шартномага лойиқ эканлигига ишонтиришдан умидвор.

Баъзилар "Оксфорд"да ўйнаётган Кэмерон Брэннаган каби қуйи босқичга ўтишади, кимдир бошқа чемпионатга йўл олади (Райан Кент), баъзилар охиригача сабр қилади. Кўпчилик футболдан дарҳол воз кечади, чунки реал ҳолат кутилмаларга тўғри келмайди.

Росситер "The Athletic" нашрига берган интервьюсида "Ливерпуль" клуби академияси у билан ҳануз алоқада бўлиб туриши ва шахсий ҳаётида ҳам ёрдам беришини айтди. Ҳозир Жордан клубсиз қолган пайтида, унинг жонажон жамоаси унга мураббийлик курсида ўқиш ёки университетга киришни таклиф қилди – "Ливерпуль" ҳаммасида кўмаклашади.

Қўллаб-қувватлаш дастури қандай ишлайди: АҚШдаги вазият

"Ливерпуль" нафақат Росситер, балки ҳеч нарсага эга бўлмаган бошқа тарбияланувчиларга ҳам ёрдам қўлини чўзмоқда. Ярим йил муқаддам клуб махсус лойиҳани ишга туширди – энди улар барча академия собиқ ўйинчиларининг фаолиятини кузатиб боради.

Фил Роско ҳаммаси учун жавобгар: у ёш футболчиларни футболдан ташқари ривожлантириш бўлимига раҳбарлик қилади – ўғил болаларнинг яхши ўқиши, ота-оналари билан мулоқотда бўлишини таъминлайди.

"Эртами-кеч ҳар бир футболчи академияни тарк этади. У "Ливерпуль" қароргоҳига борадими ёки бошқа жойгами, фарқи йўқ. Биз биргаликда кўп нарсаларни бошдан кечирдик. Агар биз болага бутун ривожланиш йўлида ҳамроҳ бўлган бўлсак, нега ёрдам қўлини чўзишни кейинчалик ҳам давом эттирмаслигимиз керак?", – дейди Роско.

Клуб академия тарбияланувчилари маълумотлар базасини яратди: унга нафақат охирги қабул қилинган йигитлар, балки 10-15-20 йил олдин "Ливерпул"ни тарк этганлар ҳам киради. Барча битирувчиларга дастур ҳақида батафсил маълумот юборилди ва улар билан қандай боғланиш масаласи келишиб олинди – улар исталган вақтда ёрдамдан фойдаланишлари мумкин.

Ҳозирда "Ливерпул"ни тарк этаётганлар учун мутахассислар махсус "чиқиш стратегияси"ни тайёрлаган: профессионал футболчилик фаолиятида омади юришмаганлар учун бошқа вариантлар таклиф қилинади – мураббийликка ўқиш ёки университетда таҳсил олиш. Футболчиларга ривожланишнинг бошқа йўллари ҳақида тушунча берилади.

Роско клуб сайтига 2020 йил май ойида интервью берган. Филнинг сўзларига кўра, ўша пайтда камида икки тарбияланувчи ушбу дастурдан фойда кўрган, улардан бири беш йил олдин академияни тарк этган, аммо ҳозирда мураббийлик фаолиятини бошлаш ниятида – УEФА B лицензиясини олиш арафасида. Иккинчиси "Ливерпул"дан Лига 1 жамоасига ўтган, лекин бу иш бермаган. Эндиликда жонажон клуби унга Англиядаги университетлардан бирида ўқишни тавсия қилмоқда.

Тарбияланувчилар билан ишлаш усули Америка университетлари ва коллежлариникига ўхшаш: улар битирувчиларнинг муваффақиятини кузатиб борадилар, чунки тушунишадики, тарбияланувчилар таълим муассасасининг юзи. Абитуриентлар қаерда ўқишни танлашида битирувчиларнинг фаолияти муҳим қўлланма бўлади. Худди шундай футбол академияси қиёфаси нафақат юқори даражадаги ёшлар, балки бошқа футболчиларнинг кейинги тақдири қандай кечганидан келиб чиқиб намоён бўлади. Улардан бири омадсиз футболчилик фаолиятидан сўнг депрессия ўрнига клуб тизимида муҳим мураббийга айланса, у бутун клуб манфаати ва унинг жозибадорлиги учун меҳнат қилади.

Тарбияланувчилар билан тизимли ишлаш ғояси академия директори Алекс Инглторпга тегишли. У "The Athletic" нашрига берган катта интервьюсида бу ташаббус ҳақида гапириб, "Ливерпуль" футбол мактаби ишига тўхталиб ўтди.

"Биз бу лойиҳани бошлаганимиздан жуда хурсандман. Агар "Ливерпул"да бутун ёшлигингизни футбол ўйнашни ўрганишга сарфласангиз, университетга кириш анча қийинроқ. 18 ёшда кўпчилик таълимнинг қадрини тушунмайди. Аммо уларнинг омадлари келмаса ва 24 ёшга тўлмасдан футбол оламидан четлашишса, бу қанчалик муҳимлигини тушунишади. Менимча, айнан шу ерда биз одамларга ёрдам беришимиз ва йўл-йўриқ кўрсатишимиз керак.

Баъзилар мураббийлик лицензиясини олади, аммо уларнинг сони кам. Кимдир университетга киради, кимдир бизнес билан шуғулланади ёки шунчаки футболда қайсидир лавозимда ишлайди. Биз учун бу футболчилар билан алоқада бўлиш муҳим, гарчи уларда ҳозир ҳаммаси жойида бўлса ҳам. Улар ёрдамга муҳтож бўлганида, биз уларнинг ёнида бўлишимиз лозим. Биз бу йигитлар учун жавобгармиз. Сиз шунчаки You'll Never Walk Alone деб куйлай олмайсиз".