Кутилган лойиҳа амалга ошди: Саудия Арабистонида янги академия фойдаланишга топширилди

Пойтахт Ар Риёдда жойлашган ушбу академияга Mahd Sports Academy номи берилди. Акаднемия очилиши муносабати билан ФИФА президенти Жанни Инфантино Саудия қиролига табрик йўллади.

Бу масканда 6 ёшдан 12 ёшгача болалар ҳамда қизлар спорт билан шуғулланишлари ва таҳсил олишлари мумкин. Академияни қуришга нима туртки бўлди? Айтиш мумкинки, Саудия Арабистони миллий терма жамоасининг ЖЧ-2018даги муваффақиятсизлиги. Саудияликлар Россияга 0:5 ҳисобида имкониятни бой бергач, мамлакат спорт вазирлиги дарҳол йиғилиш ўтказиб футболдаги ҳолатни муҳокама қилди. Шундан сўнг бир қарорга келиниб, замонавий академия барпо этиш ишлари бошлаб юборилди. 

Эндиликда Саудия Арабистони бир қатор мусобақаларни ўзида ташкил қилиб жаҳон эътиборини қозонмоқчи. Ўтган мавсум ўтказилган Испания ва Италия Суперкубоги ҳамда бокс бўйича жаҳон чемпионати фикримизга мисол бўла олади. Ушбу мамлакат Mahd Sports Academy орқали ҳам бошқалар эътиборини қозонишни мақсад қилган. Бундан ташқари Саудия Арабистонида 2030 йилга қадар яна бир нечта спорт лойиҳаларни ташкил этиш ҳамда халқаро мусобақаларни ўтказиш режаси ишлаб чиқилган.