Кевин де Брюйне Конте ва Гвардиолани таққослади

Бельгиялик ярим ҳимоячи, "Наполи" футболчиси Кевин де Брюйне неаполликларнинг бош мураббийи Антонио Конте ва "Манчестер Сити"ни бошқараётган Пеп Гвардиола ўртасидаги фарқлар ҳақидаги саволга жавоб берди.

"Айтиш қийин, чунки мен "Наполи" сафида ҳали бор-йўғи иккита ўйин ўтказдим. Контенинг услуби Пепникидан анча фарқ қилади. У жуда ҳам тактик, ўйин суръати эса бироз секинроқ. Ўйин услуби бошқача, майдонлар ҳам турлича — улар бу ерда қуроқроқ. Шунинг учун темпни ушлаб туриш қийин", — дейди Кевин де Брюйне.

Эслатиб ўтамиз, шу ёзда 34 ёшли ярим ҳимоячи "Манчестер Сити"дан "Наполи"га эркин агент сифатида ўтган эди. Жорий мавсумда у А Серияда икки ўйин ўтказиб, бир гол урди. Transfermarkt портали маълумотларига кўра, унинг ҳозирги бозор қиймати 20 млн еврони ташкил қилади.