“Кардифф Сити” Ўзбекистонда фарм-клубини очади

Бу ҳақда ахборот ҳамкоримиз ҳисобланган “Футбол Экспресс” газетаси хабар бермоқда.

Маълумотларга кўра ушбу ғоя Ўзбекистон биринчи лигасида иштирок этувчи “Оқ-тепа” клуби президенти Сарвар Шоғуломовдан чиққан. Газета мухбири клуб президентидан интервью олди.  

“Бир ҳафта муқаддам жамоамиз қошида ташкил қилинган футбол мактаби директори Владимир Гаврилов билан қўшни Қозоғистонга бориб келдик”, - деб гап бошлади Сарвар Шоғуломов.  У ерда тўрт кун бўлиб, бир қатор масалалар юзасидан музокаралар ўтказиб қайтдик. Хусусан, “Кардифф Сити”да спорт директори лавозимида фаолият олиб бораётган дўстим Алишер Апсаламов билан учрашиб, суҳбатлашдик. Насиб қилса, “Кардифф Сити” қўшни Қозоғистон ва Ўзбекистонда ўз фарм-клубини очади.

Ушбу фикр мендан чиқди. Беш ойдан буён шу ҳақида ўйлаб юргандим. Алишер билан фикримиз бир жойдан чиқди. Айни вақтда ҳужжат ишлари олиб борилмоқда. Яъни, юртимизда фарм-клуб очиш учун нималар кераклиги борасида ишлаяпмиз. Бу ишларнинг барчаси ижобий якунлангач, “Кардифф Сити”нинг фарм-клуби юртимизда ўз фаолиятини бошлайди.

Ўзбекистондаги фарм-клуб “Кардифф Сити”га тегишли бўлади. Улар юртимиздаги фарм-клубни молиявий томондан ва форма, экипировка билан таъминлайди. Оддий қилиб айтганда, “Кардифф Сити”нинг юртимиздаги жамоаси ташкил қилинади. Биз бу жамоани Ўзбекистондаги ташкилий ишлари билан шуғулланамиз.

Агар қонуний томондан имкон бўлса, жамоани Ўзбекистон чемпионати баҳсларида иштирок этишини таъминлашимиз мумкин. Биз футболчиларни маълум ёшгача шуғуллантириб, тарбиялаб берамиз. Англиядаги бош жамоа қайси футболчини маъқул топса, ўшани “Кардифф Сити”га олиб кетади”, - дейди “Оқ-тепа” клуби президенти.


Фурқатбек Нишонов суҳбатлашди.
"Футбол Экспресс" газетаси.