Кападзе ва Ҳакимовни иккинчи даврада “Нефтчи”да кўрамиз...ми?

Бунга фарғоналиклар устози Мурод Исмоилов “Олмалиқ” билан ўйиндан сўнг ўз муносабатини билдириб ўтди.

- Албатта танаффус вақтида айрим чизиқларни кучайтириш учун кўз остимизга олиб қўйган ўйинчилар йўқ эмас. Лекин ҳозирча уларнинг номини айтиш шарт эмас. Кападзе ва Ҳакимов номлари эса очиғи бизнинг режамизда йўқ эди. Лекин уларнинг иккисини ҳам агарда имкони бўлса, жамоамда кўриш истардим. Чунки Темурлар ўйинчи эмас, улар профессионал футболчидир. Улар ўйнашни билади. Тажрибали Темур Кападзе айни дамда “Локомотив” шарафини ҳимоя қилмоқда. Бир нарсани тўғри тушуниш лозим, бугунги кунда “Нефтчи” билан “темирйўлчилар”нинг шароити анчагина фарқ қилади. Истайсизми йўқми, ёш ўтган сари ҳар қандай футболчи келажакни таъминлаб олиши учун ишлайди.

- Иқтидорли футболчи Темур Ҳакимовга келадиган бўлсак, унинг имкониятларини яхши биламиз. “Пахтакор” футбол клуби тарбияланувчиси. Кубок баҳсида “Оқ-тепа” билан ўйнаганимизда ушбу футболчи бизда илиқ таассурот қолдирди. Лекин бу унинг иккинчи даврада жамоамизга келади дегани эмас. Қолаверса Ҳакимовни айни дамда “Оқ-тепа” билан амалда шартномаси бор.

- Ўзимга қолса, Темурларнинг ҳар иккисини ҳам “Нефтчи”да кўришни хоҳлардим. Чунки улар бизга ёрдам бера оладиган футболчилардир – дейди Мурод Исмоилов.

Исломбек Рустамбеков