"Барселона" жума куни "Камп Ноу" таъмири жараёнида ҳаётдан кўз юмган ишчининг ўлими муносабати билан чуқур қайғуда эканини билдирди.
Испания чемпиони Х ижтимоий тармоғидаги саҳифасида бу йўқотишдан қаттиқ афсусда эканлигини ёзиб қолдирди:
"Клуб марҳумнинг оила аъзоларига, дўстлари ва ҳамкасбларига ўзининг чуқур ҳамдардлигини билдиради ҳамда уларга чин дилдан ёрдам беришга кафолат беради".
Шунингдек, жамоа президенти Жоан Лапорта оилага шахсан таъзия изҳор қилиш ниятида эканини ва бутун клуб номидан уларни қўллаб-қувватлашга тайёрлигини маълум қилди.
Каталония полицияси воқеани ўша куни кечқуруноқ тасдиқлади. Тезкор хизмат ходимлари 54 ёшли эркакнинг ўлимига кучли зарба сабаб бўлганини тахмин қилишмоқда. Ҳозирда қўшимча тергов ҳаракатлари бошланган.
"Камп Ноу"ни қайта қуриш ишлари 2023 йилда бошланган эди. Таъмирлаш жараёни, катта эҳтимол билан, 2028 йилнинг баҳоридагина тўлиқ якунланади. Қайта таъмирдан сўнг арена ўз бағрига 105 000 мухлисни сиғдира оладиган бўлади – бу дунёдаги энг йирик стадионлардан бирига айланишини англатади.
Бироқ "AFP" ахборот агентлиги хабарига кўра, мазкур лойиҳа узоқ вақтдан бери танқидлар остида қолиб келмоқда. Маълумотларга қараганда, ўтмишда меҳнат шароитларининг ёмонлиги бўйича бир неча бор шикоятлар келиб тушган ва бунинг оқибатида қурилиш ишлари уч йилдан сўнг секинлашиб қолган.
