ЖЧ-2018. Гуруҳ босқичидан сўнг: Африкадан ҳеч ким қолмади

Кеча бўлиб ўтган тўртта ўйиндан сўнг 1/8 финалга чиққан барча жамоалар ҳамда кейинги босқич жуфтликлари маълум бўлди. Шундай қилиб 32 жамоадан бахтли 16таси курашни давом эттиради.

Статистикага мурожаат қиладиган бўлсак, УЕФА (Европа)дан 14та жамоа ЖЧ-2018 йўлланмасини қўлга киритганди. Гуруҳ ўйинлари якунига етгач, тўртта жамоа мундиал билан хайрлашди. Булар - Германия, Исландия, Польша ва Сербия. Мухлислар учун айниқса амалдаги жаҳон чемпиони Германиянинг гуруҳдан чиқа олмагани кутилмаган воқеа бўлди.

КОНМЕБОЛ (Жанубий Америка)дан эса фақат битта жамоа ўз иштирокини гуруҳ босқичидаёқ тугатди. Бу - Перу терма жамоаси. Тўртта жамоа эса 1/8 финалда ўйнайди. Булар - Аргентина, Бразилия, Уругвай ва Колумбия.

ОФКдан тарихда илк марта бешта жамоа ЖЧда иштирок этди ва фақатгина Япония гуруҳдан чиқа олди. Қолган тўрт жамоа Эрон, Австралия, Жанубий Корея ва Саудия Арабистони шу билан уйга қайтиб кетишди. Бу йил мундиалда Африкадан доимгидек беш жамоа қатнашди. Лекин бу жамоалардан бирортаси кейинги босқичга чиқа олмади. Миср, Марокаш, Нигерия, Сенегал ва Тунис - буларнинг ҳаммаси мундиални тарк этишди.

Ва ниҳоят, КОНКАКАФдан учта жамоа қатнашди ва фақат Мексика гуруҳдан чиқа олди. Панама ва Коста Рика эса мусобақа билан хайрлашди. Эътибор берган бўлсангиз, фақат Африка вакилларидан буёғига ҳеч ким қолмади.

Энди кураш янада қизийди. Буёғига ютқазган жамоа уйига қайтиб кетаверади. Эртадан нимчорак финал баҳсларига старт берилади. Қуйида жуфтликларни яна бир карра эслатиб ўтамиз.    

30 июнь. 19:00. Франция - Аргентина
30 июнь. 23:00. Уругвай - Португалия

1 июль. 19:00. Испания - Россия
1 июль. 23:00. Хорватия - Дания

2 июль. 19:00. Бразилия - Мексика
2 июль. 23:00. Бельгия - Япония

3 июль. 19:00. Швеция - Швейцария
3 июль. 23:00. Колумбия - Англия