Жавоҳир Қаҳрамонов: "Сўғдиёна" мавсумни кучли бешликда якунлашга ҳаракат қилади"
04 ноя 2020 10:33
Янгиликлар

Жавоҳир Қаҳрамонов: "Сўғдиёна" мавсумни кучли бешликда якунлашга ҳаракат қилади"

Жиззахнинг "Сўғдиёна" жамоаси Суперлига 22-туридан "Металлург" билан 0:0 ҳисобида дурангга имзо чекди.

Ушбу учрашувдан сўнг мезбонлар ярим ҳимоячиси Жавоҳир Қаҳрамоновни фикрлари билан қизиқдик.

"Металлург" яхши жамоа. Улар бизга қарши муносиб ва етарлича тайёргарлик кўргани ўйин давомида билиниб турди. Умуман олганда икки жамоа ҳам яхши ўйин ўтказди деган бўлардим. Гол уриш учун етарлича вазиятларга эга бўлдик. Аммо, самара чиқара олмадик. Нима ҳам дердим бу футбол, рақибга навбатдаги учрашувларда омад тилаб қоламан. Ўз ўрнида биз ҳам ғалаба қозониб мухлисларни хурсанд қилишга ҳаракат қиламиз",- дейди Жавоҳир Қаҳрамонов.

- "Сўғдиёна"да назарий жиҳатдан бешинчи ўринни эгаллаш учун имконият сақланиб қолинди...

- Ҳа, олдинда яна тўртта тур кутмоқда. Мана шу учрашувларда керакли очколарни жамғариб мавсумни кучли бешликда якунлашга интиламиз. Ҳар бир ўйинда ғалаба учун майдонга чиқамиз.

- Жамоа ўтган мавсумда тўртинчи ўринни олгани сабабли бу йил мухлислар янада кўпроғини кутишган эди...

- Тўғри, ушбу мавсумда жуда кўп очколарни йўқотдик. Футболда ҳамма нарса рўй бериши мумкин. "Металлург" билан ўйинда бизни қўллаб-қувватлашгани учун уларга раҳмат айтиб қоламан.