Шундан бери Корея футбол ассоциациясида ҳам ўзгаришлар рўй бера бошлади. Хусусан КФА техник қўмитаси раҳбари этиб 66 ёшли Ким Хо Гон тайинланди. У шу пайтгача ушбу бўлимни бошқариб келган Ли Ёнг Су ўрнини эгаллади. Ли Ёнг Су 15 июнь куни Шитилике билан биргаликда ўз лавозимидан олинганди.
Янги раҳбар Ким Хо Гоннинг илк иши миллий терма жамоага янги бош мураббий топиш бўлади. Мағлубиятга учраган бўлса-да, кореяликлар ҳамон гуруҳда иккинчи ўринни эгаллаб туришибди. Ж.Корея 31 август куни ўз майдонида Эронни қабул қилади ва 5 сентябрь Тошкентда Ўзбекистон терма жамоаси меҳмони бўлади.
Техник қўмитанинг янги раҳбари Жанубий Корея футболи учун кўп ишларни амалга оширган. Хусусан у мураббийлик қилган пайтда Корея 2004 йилги Олимпиада ўйинларида чорак финалга қадар борган. 66 ёшли мутахассис 1988, 1992 йилги Олимпиада ўйинлари ҳамда 1986 йилги жаҳон чемпионатида ёрдамчи мураббий бўлиб ишлаган.
Ким Хо Гон 2015 йилдан бери КФА вице-президенти лавозимида ишлаб келаётганди.
