Интервью. Лутфулла Тўраев: "Ҳозир паспортга қарашнинг вақти эмас"
04 окт 2019 11:41
Янгиликлар

Интервью. Лутфулла Тўраев: "Ҳозир паспортга қарашнинг вақти эмас"

"Бунёдкор" клуби ва Ўзбекистон терма жамоаси ярим ҳимоячиси Лутфулла Тўраев 3 октябрь куни championat.asia сайтига қисқа интервью берди.

"2 октябрь куни йиғинни бошладик. Бир кун аввал Суперлигада тур ўйинлари бўлиб ўтгани боис дастлабки кун асосан тикланиш машғулотларини бажардик. Бугундан (3 октябрь) тўлақонли машқларни бажаришни бошлаймиз", - деб гап бошлади Тўраев.

- 4 йиллик танаффусдан сўнг яна терма жамоага чақирув олдингиз. Нималарни ҳис қилаяпсиз?
- Ҳиссиётлар ўзгача. Барибир миллий терма жамоада ўйнаш бошқача. Қўлимдан келганича ватанимиз жамоасига ёрдам беришга ҳаракат қиламан.

- Ўзингиз ҳам кузатаётган бўлсангиз, мухлислар томонидан ёшингиз билан боғлиқ танқидлар кўп айтилмоқда...
- Ҳозир ёш ёки паспортга қарашнинг вақти эмас деб ўйлайман. Масалан, Россия терма жамоасида 36-37 ёшли футболчилар ўйнамоқда. Ҳозир 31 ёшдаман ва ўзимни қари деб ўйламайман. Терма жамоага лойиқ эканлигимни майдонда исботлашга бор кучимни бераман ва халқимизни ғалабалар билан хурсанд қилишга ҳаракат қиламиз.